რატომ გაჩნდა ქართული წარწერა სასტუმრო „ლომსიაზე“

1 ნოემბერს ახალციხის ცენტრში მდებარე სასტუმრო „ლომსიას“ ქართულენოვანი წარწერა გაუკეთეს. სასტუმროს გენერალური დირექტორის მოადგილე ამირან ქიმერიძე აცხადებს, რომ სასტუმროზე ქართული წარწერის გაკეთება გახნის დღიდანვე იგეგმებოდა, თუმცა აქამდე ეს ვერ მოხერხდა.

„ახლა კანონიც მიიღეს, რომელის თანახმადაც, ინგლისურ წარწერასთან ერთად შენობას აუცილებელად უნდა ჰქონდეს ქართული წარწერაც. კანონს დავემორჩილეთ და სასტუმროზე ქართული წარწერა დავამატეთ“, - ამბობს ქიმერიძე.

კითხვაზე, აქვს თუ არა კავშირი წარწერის დამატებას მიხეილ სააკაშვილსა და ადგილობრივ ბეჟან კაჭკაჭაშვილს შორის მომხდარ შელაპარაკებასთან, ქიმერიძე გვპასუხობს: „შეიძლება ითქვას, რომ მომხდარმა ქართული წარწერის დამატება დააჩქარა. თითქოს მეტი საფუძველი გაჩნდა, რომ ქართული წარწერა უფრო სწრაფად გაგვეკეთებინა“.

შეგახსენებთ, რომ 16 სექტემბერს საქართველოს პრეზიდენტმა მიხეილ სააკაშვილმა ყოფილი პრემიერ-მინისტრის ვანო მერაბიშვილის მშობლების მონახულების შემდეგ, სასტუმრო „ლომსიაში“, სამცხე-ჯავახეთში პრეზიდენტის რწმუნებულთან ივანე წიკლაურთან ერთად ისადილა. აქედან გამოსვლის შემდეგ მას ახალციხელმა ბეჟან კაჭკაჭიშვილმა სასტუმროს ინგლისურენოვანი წარწერის შესახებ ჰკითხა: „სად არის ქართული ატრიბუტები?! ქართული დროშა?! აქ არ უნდა იყოს ქართული წარწერა?!“

კაჭკაჭაშვილის განცხადებას პრეზიდენტის გაღიზიანება მოჰყვა.

"ნაგავში იყო აქაურობა! ნაგავში ცხოვრობდით? ნაგავში ყოფნა გერჩივნათ?!“ - მიმართა პრეზიდნეტმა მის გარშემო შეკრებილ ახალციხელებს.

სასტუმრო „ლომსია“ გასული წლის 9 აგვისტოს გაიხსნა. მასზე ქართული წარწერა კი გახსნიდან წელიწადისა და 2 თვის შემდეგ გაკეთდა.

[sknews.ge]