ფოტო: ახალციხის მერიასომხურ თემთან შეხვედრა ახალციხის მუნიციპალიტეტის მერიის შენობაში 15: 00 საათზე გაიმართა.
„სკოლის მოსწავლეებს ხშირად აქვთ სომხური ანბანის წიგნების ნაკლებობა. 20 მოსწავლეს 2–3 წიგნი აქვს მხოლოდ. გარდა ამისა, სომხური ენის მასწავლებელს არ აქვს უფლება კვალიფიკაცია აიმაღლოს, ამიტომ ვერ იღებს სათანადო ხელფასს. გვინდა სკოლებში სომხური ისტორიაც ისწავლებოდეს“, – უთხრეს ადგილობრივებმა სომხეთის რესპუბლიკის პრემიერ–მინისტრის აპარატის მთავარ კომისარს ზარეჰ სინანიანს.
მთავარი კომისარის განცხადებით, აღნიშნულ საკითხზე გუშინ სამ თებერვალს შეხევდრა ჰქონდა შერიგებისა და თანასწორობის საკითხებში სახელმწიფო მინისტრთან, ქეთევან ციხელაშვილთან: „გვითხრა რომ ძალიან მალე მოგვარდება ეს საკითხები“.
რაც შეეხება სომხური ისტორიის წიგნებს, ზარეჰ სინანიან ამბობს, რომ ახალციხის ახალგაზრდულ ცენტრში სახელმძღვანელოების საკმარისი რაოდენობაა.
ადგილობრივების განცხადებით პრობლემაა ის, რომ ორმაგი მოქალაქეობის მქონე პირებს, სავალდებულო სამხედრო სამსახურის გავლა ორჯერ უწევთ, საქართველოში და სომხეთში.
„საქართველოში დაბადებული ბიჭი რომელსაც აქვს ორმაგი მოქალაქეობა, სომხეთი ავალდებულებს ჯარში წავიდეს, მაშინ როდესაც ეს ბიჭი უკვე მოემსახურა თავის სამშობლოს რატომ? ასევე გვაინტერესებს რატომ არ უშვებენ მოსწავლეებს სკოლიდან გენოციდის დღის აღსანიშნავად“, – იკითხეს ადგილობრივებმა.
„ადამიანი როდესაც მოქალაქეობას იღებს, ამ მოქალაქეობას აქვს როგორც უფლებები ისე მოვალეობები და ეს არ ნიშნავს უბრალოდ პირადობის მიღებას. სომხეთში კანონი ასეთია: თქვენ შეგიძლიათ იყოთ რვა ქვეყნის მოქალაქე და ეს პრობლემა არ იქნება, მაგრამ სომხეთში სავალდებულო სამხედრო სამსახური მაინც უნდა მოიხადოთ“, – განუმარტა მთავარმა კომისარმა.
მისი თქმით, საკითხებს, რაზეც დღევანდელ შეხევდრაზე ისაუბრეს, შესაბამის უწყებებთან დააყენებს: „დაისვა კითხვები როგორც ჩემი მისამართით ასევე ახალციხის მუნიციპალიტეტის წარმომადგენლებისთვის. ბევრი კითხვა იყო განათლებაზე, დაწყებული მასწავლებლის კვალიფიკაციიდან და დამთავრებული სომხური ისტორიის სწავლებით. აღნიშნული კითხვებიდან ზოგიერთი ვერ მოგვარდება, ნაწილზე კი ჩვენ ვიზრუნებთ".
ადგილობრივები ამბობენ, რომ მსგავსი შეხვედრა ხშირად უნდა იმართებოდეს.
„კითხვები დავსვით განათლებაზე, ქართულ და სოხურ ურთიერთობებზე. იმედი გვაქვს რომ ქართულ–სომხური თანამშრომლობა უფრო გაძლიერდება“, – გვითხრა ედუარდ აივაზიანმა.
„ჩვენ აქ ვართ იმისთვის რომ გავიგოთ რა პრობლემები გაქვთ და რით შეგვიძლია დაგეხმაროთ, თქვენ ცხოვრობთ მეზობელ ქვეყანაში გვინდა რომ კარგად იგრძნოდ თავი იქ სადაც ცხოვრობთ. ჩვენ სომხეთში არ გვაქვს გაზი, ნავთი, ბრილიანტები. ჩვენი ბრილიანტი, ნავთი და გაზი სომეხი კაცია“, – განაცხადა ზარეჰ სინანიანმა.
სომხეთის რესპუბლიკის პრემიერ–მინისტრის აპარატის მთავარი კომისარი დიასპორის საკიხებში, ზარეჰ სინანიანი და სომხეთის საგანგებო და სრულუფლებიანი ელჩი საქართველოში, რუბენ სადოიანი ხვალ ხუთ თებერვალს შეხვედრებს ახალქალაქსა და ნინოწმინდაში გამართავენ.
ფოტო: ახალციხის მერია[რიმა სარუხანიან, ახალციხე]