სომეხი აბიტურიენტები ეროვნული გამოცდების ჩასაბარებლად ერევანში ვერ მიდიან

ვლადიმერ სნხჩიანმა ახალციხის მესამე საჯარო სკოლა წელს დაამთავრა. სწავლის გაგრძელებას ერევნის სახელმწიფო უნივერსიტეტში გეგმავს და გამოცდების ჩასაბარებლად დარეგისტრირდა კიდეც, მაგრამ შიშობს, რომ ჩაკეტილი საზღვრის გამო, წასვლას ვერ შეძლებს.

„სომხეთში ინფორმატიკის ფაკულტეტზე ვარ დარეგისტრირებული, ივლისიდან დაიწყება გამოცდები. რადგან საზღვრები ჩაკეტილია და ვერ მივდივარ, მივმართე ერევნის სახელმწიფო უნივერსიტეტს და განათლების სამინისტროს. მითხრეს, რომ ვერ დამეხმარებიან, რადგან დისტანციურად გამოცდების ჩატარება ჯერ შესაძლებელი არ არის“, – ამბობს ვლადიმერი და ამატებს, რომ ენობრივი ბარიერის გამო, ქართულ უნივერსიტეტში ჩაბარებას ვერ შეძლებს, ამიტომ თუ საზღვარი არ გაიხსნა, ერთი წლის გაცდენა მოუწევს.

საზღვრების გახსნას ელოდება კიდევ ერთი ახალციხელი აბიტურიენტი სეირან ტნკოზიანიც. დასარეგისტრირებლად დრო 13 ივლისიდან 25 აგვისტომდე აქვს, გამოცდები კი სექტემბერში ეწყება: „იმედი მაქვს რომ სექტემბრამდე სომხეთსა და საქართველოს შორის საზღვრები გაიხსნება და გამოცდების ჩასაბარებლად წასვლას შევძლებ“.

მსგავსი პრობლემაა ჯავახეთშიც, აბიტურიენტებმა წერილობით მიმართეს სომხეთის პრემიერ–მინისტრს, ნიკოლ ფაშინიანს, განათლების მინისტრს არაიკ ჰარუთუნიანს, შეფასებისა და ტესტირების ცენტრის დირექტორის მოვალეობის შემსრულებელს რუბენ სადოიანს, სომხეთის ელჩს საქართველოში იური ვარდანიანს და დიასპორის საკითხებში კომისარ ზარეჰ სინანიანს.

საინფორმაციო სააგენტო Jnews.ge ინფორმაციით, აბიტურიენტები ითხოვენ, რომ საქართველოში დროებითი საგამოცდო ცენტრი შეიქმნას და საზღვრების გახსნამდე გამოცდების ჩაბარება აქ შეძლონ.

[რიმა სარუხანიან, ახალციხე]