ადგილობრივი: ახლადშეცვლილი სახურავიდან წვიმა სახლის კედელს ასველებს

„ძველი შიფრები მივაყუდე კედელს, რომ წყალი საძირკველში არ ჩავიდეს. წვიმა საწვიმარ ღარში კი არა კედლებზე ჩამოდის“ , – გვეუბნება მესხეთის ქუჩაზე მცხოვრები შუშან ავაკიანი.

სამშენებლო კომპანია „მშენ–ბენში“ ამბობენ, რომ სახურავები პროექტის მიხედვით გააკეთეს: „ნამი ყველა სახურავიდან ცვივა. მაგათ კედელი ცოტა გამოწეული აქვს და რა გავაკეთო. მე პროექტის მიხედვით გავაკეთე“.

მას შემდეგ რაც თემით „სამხრეთის კარიბჭე“ დაინტერესდა, მესხეთის ქუჩაზე ახალციხის მუნიციპალიტეტის მერიის თანამშრომლები მივიდნენ. ადგილზე იმყოფებოდნენ მშენებელი კომპანიის და მერიის ინფრასტრუქტურის თანამშრომლები.

ახალციის მერის მრჩეველი ინფრასტრუქტურის საკითხებში გელვასი გელაძე ამბობს, რომ კომპანიას სახურავი კარგად აქვს გაკეთებული: „სამშენებლო ნორმის დაცვით არის გაკეთებული, ერთ ადგილზე მუხლიდან გასდის და კომპანია იმას გამოცვლის“, – ამბობს გელვასი გელაძე.

მისი თმით, ჯერ კომპანიასთან მიღება–ჩაბარების აქტი გაფორმებული არ არის: „საზედამხედველო ორგანოებიდან პასუხს ველოდებით“.

კომპანია „მშენ–ბენმა“ მესხეთის ქუჩაზე სახურავი რამდენიმე საცხოვრებელ სახლს შეუცვალა.



[რიმა სარუხანიან, ახალციხე]