მესხეთის თეატრის გარდერობსა და ფოიეში წყალი ჩადის

მესხეთის თეატრის ადმინისტრაციამ წყლის წვეთები რამდენიმე დღის წინ შენიშნა. სახურავიდან წყალმა გამოჟონვა მას შემდეგ დაიწყო, რაც სახურავზე თოვლი დადნა.

წყალი თეატრის ფოიესა და გარდერობში ჩადის. მსახიობების კოსტუმები რომ არ დაზიანდეს, მათ პოლიეთილენის პარკები დააფარეს.

მესხეთის სახელმწიფო თეატრის დირექტორი ირაკლი ათუნაშვილი ფიქრობს, რომ სახურავი არასწორადაა შეკეთებული. იგი პასუხისმგებლობას შპს „ქრისტინე სარაშვილს“ აკისრებს, რომელმაც თეატრს სარემონტო სამუშაოები ჩაუტარა.

„შეიძლება წყალმა ადმინისტრაციის წარმომადგენლების ოთახებშიც გაჟონოს. კომპანიას ევალება ამ ხარვეზის გამოსწორება“, – ამბობს იგი.

მშენებელი კომპანია, რომელმაც მესხეთის თეატრში სარემონტო–სამუშაოები ჩაატარა აცხადებს, რომ წყლის გაჟონვასთან კომპანია არაფერ შუაშია. შპს „ქრისტინე სარაშვილის" დირექტორის ნუგზარ სარაშვილის მტკიცებით, მესხეთის თეატრს არასწორი პროექტი ჰქონდა და პრობლემები ამიტომ შეიქმნა.

„მანდ ჩემი ბრალი არაფერია. მე რა პროექტიც მქონდა, ის სახურავი გავაკეთე“, – ამბობს სარაშვილი და ამატებს, რომ დაზიანებული სახურავი უკვე დაათვალიერა. იმ შემთხვევაში თუ სახურავიდან წყლის გაჟონვა მშენებელ კომპანიას დაბრალდა, ხარვეზებს აუცილებლად გამოასწორებს.

შეგახსენებთ, რომ მესხეთის თეატრის სახელმწიფო დრამატული თეატრის სარეაბილიტაციო სამუშაოებისთვის კულტურის სამინისტრომ 140 ათასი ლარი გამოყო. სარეაბილიტაციო სამუშაოებს შპს „ქრისტინე სარაშვილი“ ასრულებდა, თუმცა დროში გაწელილი და უხარისხოდ შესრულებული სამუშაოების გამო კომპანიასთან ხელშეკრულება გაწყდა და სამუშაოებს ექსპერტიზა ჩაუტარდა.

[ვარლამ წიკლაური, ახალციხე]