რას გეგმავს მესხეთის თეატრი 2020 წელს

მესხეთის დრამატულმა თეატრმა სეზონი უკვე გახსნა, ხვალ 29 იანვარს მაყურებელს შეუძლია რეჟისორ გიორგი შალუტაშვილის სპექტაკლი „მშვიდი ღამე“ იხილოს.

„ყველაზე აქტიური სეზონი გვექნება. დავდგამთ მინიმუმ ექვს პრემიერას, ასევე აღდგება ძველი სპექტაკლები, გარდა ამისა, ჩამოგვყავს ორი რეჟისორი, რუმინეთიდან რადუხ ღილაჩი [სახე და ცა] და უკრაინიდან სერგეი პავლიუკი [ქორწინება]. მათ ექნებათ წარმოდგენილი საინტერესო და კარგი სპექტაკლები“, – ამბობს თეატრის სამხატვრო ხელმძღავანელი ლია სულუაშვილი.

მესხეთის თეატრის დასი ფესტივალში მონაწილეობის მისაღებად ოთხ ქვეყანაში გამგზავრებას გეგმავს, უკრაინაში, პოლონეთში, თურქეთსა და ნიდერლანდებში.

„უცხოელი რეჟისორების სპექტაკლების გამართვის შემდეგ, ჩვენ მივდივართ უკრაინაში, ქალაქ კიევში ფესტივალზე, გვაქვს შემოთავაზება პოლონეთიდან, თურქეთიდან და ამსტერდამიდან“.

გარდა უცხოეთისა, მსახიობები გასტროლებს ქვეყნის შიგნითაც აპირებენ. პირველი გასტროლი გორში 20 და 21 თებერვალს იგეგმება, სადაც წარმოდგენილი იქნება „ღია შუშაბანდი“ და „ზოოპარკის ისტორია“.

„გორის შემდეგ, ჭიათურასა და თელავში წავალთ. პარალელურად ვამზადებთ საბავშვო სპექტაკლს „მაუგლი“, სადაც დიდ მსახიობებთნ ერთად პატარებიც მიიღებენ მონაწილეობას. პატრა მაყურებლებს დიდ სიურპრიზს ვუმზადებთ. შიდა გასტროლები გაგრძელდება იქამდე, სადამდეც შემოსავალი გვეყოფა“, – ამბობს სულუაშვილი.

2020 წელს მესხეთის თეატრის ბიუჯეტი 385 000 ლარია. დასი 80 000 ლარით ახალციხის მერიამ დააფინანსა, ხოლო 225 000 ლარი კულტურის სამინისტრომ გამოყო.

ლია სულუაშვილის განცხადებით, დაფინანსებული თანხა საკმარისი არ არის.

„წელს ხელფასზე დაგვემატა 100 ლარამდე. საქართველოს მასშტაბით ყველაზე ნაკლები დაფინანსება ჩვენ გვაქვს, თუ არ ჩავთვლით სენაკის თეატრს. ახალციხის მერიამაც გამოგვიყო 80 000 ლარი, მაგრამ თანხის დიდი ნაწილი იხარჯება უცხოელი რეჟისორების მოწვევაზე, მათი ჩამოყვანა, დაბინავება, ჰონორარი, ძვირი ჯდება, მაგრამ ჩვენი თეატრის პოპულარიზაციისთვის ძალიან მნიშვნელოვანია".

თეატრს 54 თანამშრომელი ჰყავს, აქედან რვა ხელშეკრულებითაა აყვანილი.

თეატრში სეზონი გუშინ, 27 იანვარს სპექტაკლით „ზოოპარკის ისტორია“ გაიხსნა.

[ნუკა სტეფნაძე, ახალციხე]