თეატრის საერთაშორისო დღე მესხეთის თეატრმა სპექტაკლით აღნიშნა

თეატრის სამხატვრო ხელმძღვანელის ლია სულუაშვილის თქმით, „დოდოს მოლოდინში“ მსახიობების ერთ-ერთი საყვარელი სპექტაკლია, ამიტომ გადაწყვიტეს, რომ თეატრის საერთაშორისო დღეს მაყურებლისთვის ეს სპექტაკლი ეჩვენებინათ.

"დოდოს მოლოდინში" მესხეთის სცენაზე რეჟისორმა ვახტანგ ბერიძემ დადგა. სპექტაკლის პრემიერა 2013 წლის 28 ნოემბერს შედგა და მას პიესის ავტორი, დათო ტურაშვილიც დაესწრო.

პარალელურად, მესხეთის თეატრის დასი სეზონის მომდევნო პრემიერისთვისაც ემზადება. 1 და 2 აპრილს მაყურებელი ჟან-პოლ სარტრის „ბუზებს“ იხილავს. სპექტაკლის დამდგმელი რეჟისორი ზურაბ სიხარულიძეა.

„თითქმის ორი თვეა, რაც ამ სპექტაკლს ვამზადებთ. რამდენადაც რთული, ფსიქოლოგიური და საინტერესოა, ამდენად დიდი დრო სჭირდება. მხოლოდ პრემიერით არ ისაზღვრება მასზე მუშაობა, მსახიობი განუწყვეტილივ ქმნის და საინტერესო დეტალებს ამატებს“, - ამბობს ლია სულუაშვილი.

სწორედ ამ სპექტაკლით წარსდგება მესხეთის (ახალციხის) პროფესიული სახელმწიფო თეატრის დასი თეატრის საერთაშორისო ფესტივალზე, რომელიც მაისში ქალაქ ტრაპზონში გაიმართება.

გარდა საერთაშორისო ფესტივალისა, თეატრის დასი გასტროლებს საქართველოს რამდენიმე ქალაქშიც გეგმავს.

„დაგეგმილი გვქონდა გორში გამგზავრება, თუმცა ფინანსების გამო ეს ვერ მოხერხდა. აპრილში დაგეგმილი გვაქვს თბილისში გავმართოთ ჩვენი საუკეთესო წარმოდგენები. ასევე, გვინდა, რომ ეროვნული დრამატურგიის მესამე თეატრალური ფესტივალი ჩატარდეს ჩვენს ქალაქში“, - ამბობს ლია სულუაშვილი.

მისივე თქმით, შესაძლებელია მესხეთის თეატრის მსახიობები სხვადასხვა საუკეთესო სპექტაკლებსაც დაესწრნონ, რაც მათ გარკვეულ გამოცდილებას მისცემს და პროფესიონალიზმის ამაღლებაში დაეხმარება. ლია სულუაშვილი ამბობს, რომ სურვილი აქვთ, რომ ახალგაზრდა მსახიობებიც მოიწვიონ, თუმცა ამ ეტაპზე თეატრს ამის საშუალება არ აქვს.

„მსახიობს როცა იწვევ, მას არ იწვევ მხოლოდ ეპიზოდური როლებისთვის, მას იწვევ, რომ რეპერტუარში კარგად გამოჩნდეს მისი მონაცემები და წამყვანი ადგილი დაიკავოს. ამისთვის, უნდა მოიწვიო აუცილებლად ძალიან ნიჭიერი, მესხეთზე შეყვარებული ადამიანი და მას ელემენტარული პირობები უნდა დაახვედრო. მაგრამ ჩვენ ამ წუთში ამის საშუალება არ გვაქვს. თუმცა, რომ გამოჩნდეს ორი ახალგაზრდა ბიჭი, ყველაფერს გავაკეთებთ იმისთვის, რომ ერთ-ორი წელი დავაკავოთ ამ თეატრში“, - ამბობს სულუაშვილი.

[თამარ თოთაძე, ახალციხე]