მესხეთის თეატრში ახალი სეზონი იხსნება

მესხეთის თეატრში ახალი სეზონი დღეს, 18 იანვარს იწყება. მცირე სცენაზე სამი მსახიობი: მანანა ბერიძე, ლიაკო გოგიძე და ანი ხუბუტია ითამაშებენ. ერთმოქმედებიანი კომედია, სახელწოდებით "თაფლობის თვე" გაბრიელ ბარილის სცენარის მიხედვით, გიორგი შალუტაშვილმა და ლია სულუაშვილმა დადგეს.

ახალ სეზონზე, თეატრში დაახლოებით შვიდი პრემიერაა დაგეგმილი. პირველი პრემიერა იანვრის ბოლოს გაიმართება. დასის სამხატვრო ხელმძღვანელი ლია სულუაშვილი მაყურებელს ნოდარ დუმბაძის "მზიან ღამეს" შესთავაზებს.

ასევე, პატარებისათვის ზღაპარი "მგელი და შვიდი ციკანი" დაიდგმება.

სამი აპრილიდან კი თეატრს ლიტველი რეჟისორი ნინა ზაიკაუსკასი ეწვევა, რომელიც უკრაინელი დრამატურგის სპექტაკლს "მოპარული ბედნიერება" დადგამს. მისი პრემიერა მაისში შედგება.

ამავე სეზონზე დასი ქვეყნის სხვადასხვა ქალაქსა და საზღვარგარეთ გასტროლებს გეგმავს: "გვაქვს გეგმაში გასტროლები გავაკეთოთ საქართველოს მთავარ ქალაქებში, ასევე ფესტივალებზე მივიღოთ მონაწილეობა", – ამბობს ლია სულუაშვილი.

მესხეთის სახელმწიფო დრამატული თეატრი კულტურის სამინისტროსგან წელს შრომის ანაზღაურებისათვის 225 000 ლარს, სადადგმო ხარჯისთვის კი 80 000 ლარს მიიღებს.

ახალციხის ადგილობრივი თვითმმართველობა კი თეატრს 50 000 ლარით აფინანსებს.

ახალ სეზონზე უცვლელი დარჩება სპექტაკლების ბილეთების ღირებულება, იგი კვლავაც 3.50 ლარი, პრემიერა კი 4.00 ლარი იქნება.

[მარიამ ბარძიმაძე, ახალციხე]