ვანო მერაბიშვილს 5 წლით თავისუფლების აღკვეთა მიესაჯა

გარდა ამისა, სასმართლოს გადაწყვეტილებით ვანო მერაბიშვილს აეკრძალა თანამდებობის დაკავება 1 წლის და 6 თვის ვადით.

რაც შეეხება ყოფილ ჯანდაცვის მინისტრს ზურაბ ჭიაბერაშვილს, მას ქუთაისის საქალაქო სასამართლოს მოსამართლემ ნათია ბარბაქაძემ 50 ათას ლარიანი ჯარიმა დააკისრა.

სასამართლო პროცესს, რომელიც ამ წუთებში მიმდინარეობს, ვანო მერაბიშვილი არ ესწრება. მერაბიშვილის ადვოკატების განცხადებით, მათთვის უცნობია რა მიზეზით განაცხადა უარი ყოფილმა პრემიერ–მინისტრმა პროცესზე დასწრებაზე.
ქუათაისის საქალაქო სასამართლოში იმყოფებიან თბილისის ყოფილი მერი, გიგი უგულავა და გიგა ბოკერია.

ვანო მერაბიშვილი და ზურაბ ჭიაბერაშვილი 2013 წლის 21 მაისს დააკავეს. მათ ბრალი სისხლის სამართლის სამი მუხლით (ამომრჩევლის მოსყიდვა, მითვისება/გაფლანგვა და სამსახურებრივი უფლებამოსილების ბოროტად გამოყენება) წარუდგინეს.

საქმე 2012 წელს დასაქმების სახელმწიფო პროგრამის განხორციელებას ეხება. მერაბიშვილსა და ჭიაბერაშვილს ედავებიან, რომ მათ სოციალური აგენტები ამ პროგრამის ფარგლებში თვალთმაქცურად დაასაქმეს, სინამდვილეში ისინი წინასაარჩევნო პერიოდში "ნაციონალების" დავალებებს ასრულებდნენ.


მერაბიშვილის საქმეში ფიგურირებს მეორე ეპიზოდიც. ეს ეპიზოდი ეხება კერძო საკუთრების - კვარიათში საცხოვრებელი სახლის მითვისებას მერაბიშვილის მიერ.

[sknews.ge]