‘დაგვიბრუნეთ წყალი და საძოვრები’ – საპროტესტო აქცია გორელოვკაში

დღეს, 20 იანვარს გორელოვკაში ადგილობრივები დილიდან შეიკრიბნენ, ისინი სოფელში ნინოწმინდის მუნიციპალიტეტის მერის, სამცხე–ჯავახეთის მხარის რწმუნებულის და პარლამენტის დეპუტატის, ენზელ მკოიანის ასვლას ითხოვენ.

„ჩვენი პრობლემა ის არის, რომ 6–7 წელია წყალი არ გვაქვს. ზოგჯერ კვირაობით წყდება. ჩვენი ხარჯებით გამოვიყვანეთ წყალი და საკრებულოს თავმჯდომარე მოვიდა ასე არ შეიძლებაო. ჩვენ ვუთხარით შენს ბოსელს თუ ყოფნის ჩვენ რატომ არ გვეყოფა –მეთქი?! სოფლის საძოვრები 4–5 კაცს აქვს დაკავებული. ვითხოვთ რომ მოგვცენ წყალი, საძოვრები და მიწები. ხალხი ძროხებს ვეღარ ინახავს, ერთ ზოლზე აბალახებენ მხოლოდ“, – ამბობს გორელოვკაში მცხოვრები ავთო ლონდარიძე.

„წყალი არავის გვაქვს, დღეს მეორე გაკვეთილიდან ბავშვები გამოუშვეს სკოლიდან რადგან წყალი არ აქვთ და გათბობას ვერ რთავენ. ადგილობრივ ხელისუფლებას რამდენჯერმე მივმართეთ და ყურადღებას არ გვაქცევენ“, – აცხადებენ ადგილობრივები.

აქციის მონაწილეებთან იმყოფება სოფელში მერის წარმომადგენელიც, მისი თქმით, წყლის პრობლემა სოფელში მოგვარებადია, რაც შეეხება საძოვრებს, ყველა თანაბრად სარგებლობს.

„წყლის მარაგი არის, მაგრამ მილები ისეა გაკეთებული, რომ სოფელში არ მოდის, ამას გავაკეთებთ. ფერმა ყველას აქვს, აქ რა შუაშია საკრებულოს თავმჯდომარე?! გორელოვკაში ბევრი საძოვარია და ყველას თანაბრად აქვს“, – ამბობს ნინოწმინიდს მერის წარმომადგენელი სოფელ გორელოვკაში ლევონ არაქელიანი.

16 იანვარს სოფელ გორელოვკაში, სასმელ წყალთაn დაკავშირებით, ნინოწმინდის საკრებულოს თავმჯდომარეს, სუმბატ კიურეღიანსა და ადგილობრივების შორის დაწყებული შელაპარაკება, ფიზიკური დაპირისპირებაში გადაიზარდა. მომხდარის შემდეგ კლინიკაში ორი დაშავებული გადაიყვანეს. საქმეზე ძიება ძალადობის მუხლით დაიწყო.

ასევე ნახეთ:

გორელოვკაში ნინოწმინდის საკრებულოს თავმჯდომარემ და ადგილობრივებმა იჩხუბეს - არიან დაშავებულები

ნინოწმინდის საკრებულოს თავმჯდომარის ოჯახის საკუთრება მონაკოს ფართობს ორჯერ აღემატება

[მარიამ ბარძიმაძე, რიმა სარუხანიან, ნინოწმინდა]