დავით ბაქრაძის დახურული შეხვედრა მესხეთში

ადგილობრივ მოსახლეობას დავით ბაქრაძე ბორჯომსა და ვალეში შეხვდა. ვალეში გამართულ შეხვედრას მედია არ დასწრებია.

ჟურნალისტები არც მოგვიანებით, ახალციხეში, პარტიის ოფისში გამართულ შეხვედრას დასწრებიან. განმარტებები ახალციხეში შეხვედრის დაწყებამდე გაკეთდა. პარტიის ლიდერებმა განაცხადეს, რომ მესხეთში სამუშაო ვიზიტით არიან და შესაბამისად, შეხვედრა დახურულია.

„ძალიან რთული ვითარებაა, ბევრი სოციალური პრობლემაა, მოსახლეობას აწუხებს სოციალური დახმარებების გაუქმება. რეგიონში განვთარების ტემპი პრაქტიკულად არ არსებობს. არჩევნებში გამარჯვების შემდეგ, გადავხედავთ და აღვუდგენთ დახმარებებს ყველას, ვისაც ბოლო ორი წლის განმავლობაში დახმარება მოუხსნეს“, – აცხადებს დავით ბაქრაძე. აქვე, იგი ირწმუნება, რომ მათი ვიზიტი მოახლოებულ არჩევნებს არ უკავშირდება და ადგილობრივების პრობლემების მოსმენას წინასაარჩევნო კამპანიასთან საერთო არაფერი აქვს.

ბაქრაძესთან ერთად მესხეთს სტუმრობდნენ საპარლამენტო უმცირესობის წევრები, ახალციხის, ადიგენისა და ასპინძის მაჟორიტარი დეპუტატები.

„აქამდე სამცხე–ჯავახეთი მთლიანად გადიოდა მაღალმთიან დასახლებაში, დაიჩეხა რაიონი. ის სოფლები, რომლებიც შედარებით მაღლა იმყოფება, მეტი სოციალური პრობლემა აქვს და ნაკლებმიწიანია, არ გავიდა მაღალმთიან დასახლებაში. მაგალითად, სოფელი უდე იმიტომ არ გაიყვანეს, რომ დიდი სოფელია, იქ არის საწარმოები და ხალხია დასაქმებული, ამ შემთხვევაში იძულებული იქნებოდნენ მოეხსნათ საშემოსავლო. მსგავსი ვითარებაა დაბა ადიგენშიც“, – ამბობს ზურაბ ჩილინგარაშვილი.

„ერთიანი ნაციონალური მოძრაობის“ წარმომადგენლები განმარტავენ, რომ უახლოეს მომავალში მსგავს შეხვედრას რეგიონის სხვა მუნიციპალიტეტებშიც გამართავენ.



[თინათინ ზაზაძე, ახალციხე]