გელა დემეტრაძე:'დავით ბაქრაძეს საპრეზიდენტო არჩევნებში გამარჯვების დიდი შანსი აქვს'

„ევროპულმა საქართველომ“ 2018 წლის საპრეზიდენტო არჩევნებისთვის კანდიდატად დავით ბაქრაძე 21 ივლისს წარადგინა.

დავით ბაქრაძე „ერთიანი ნაციონალური მოძრაობიდან“ პრეზიდენტობის კანდიდატი იყო 2013 წლის საპრეზიდენტო არჩევნებზეც, რა დროსაც ამომრჩეველთა ხმების 21,71 % დააგროვა, მაშინ ხმათა 62.09 %–ით საქართველოს პრეზიდენტი მმართველი გუნდის "ქართული ოცნების" კანდიდატი გიორგი მარგველაშვილი გახდა.

„ევროპული საქართველოს“ ახალციხის რაიონულ ორგანიზაციაში ამბობენ, რომ ბაქრაძეს 2013 წელთან შედარებით, წელს გამარჯვების რეალური შანსი აქვს.

„მაშინ ახალი შეცვლილი იყო ხელისუფლება, ძალიან ბევრი დაუმსახურებელი და ბინძური კამპანია აგორდა ჩვენს წინააღმდეგ. ახლა სულ სხვა ვითარებაა, საზოგადოებამ ძალიან კარგად დაინახა "ქართული ოცნების" შესაძლებლობები, ჩვენ კი ბევრად მეტი შანსი გაგვიჩნდა. დავით ბაქრაძის კარგი პოლიტიკური წარსული ყველამ იცის და არც გამოცდილება აქვს დასაწუნი",–ამბობს „ევროპული საქართველოს“ ახალციხის რაიონული ორგანიზაციის თავმჯდომარე გელა დემეტრაძე.

მისი თქმით, აქტიურ წინასაარჩევნო კამპანიას, აგვისტოს შუა რიცხვებიდან დაიწყებენ, როდესაც პარტიის საარჩევნო პროგრამა ცნობილი გახდება.

შეგახსენებთ, რომ „ევროპულმა საქართვლომ“ პრეზიდენტობის კანდიდატი 21 ივლისს, ქუთაისში სპორტის სასახლეში წარადგინა. ამ დროისათვის, კიდევ ერთი პრეზიდენტობის კანდიდატია ცნობილი. გაერთიანებულმა ოპოზიციამ "ძალა ერთობაშია", სადაც ათი პოლიტიკური პარტია ერთიანდება, პრეზიდენტობის კანდიდატად "ნაციონალური მოძრაობის" პოლიტსაბჭოს წევრი გრიგოლ ვაშაძე დაასახელა.

[ლუბა გიორგაძე, ახალციხე]