კეთილმოწყობის სამსახურმა ახალციხეში საპროტესტო წარწერების ნაწილი გადაღება

შპს კეთილმოწყობის სამსახურის უფროსის, კობა კურტანიძის განმარტებით, წარწერები შინაარსის გამო გადაღებეს.

„ჩვენი თანამშრომლები ყველას შლიან, თუ ეს კერძო საკუთრებაზე არაა გაკეთებული. ეს წარწერებიც ამიტომ გადაღებეს. თან ამ შემთხვევაში გინებაც იყო“, – ამბობს კობა კურტანიძე.

კითხვაზე თუ რატომაა ხელუხლებელი სხვა წარწერები და ნახატები, მათ შორის იმავე კედელზე, კურტანიძე გვპასუხობს: „ყველაფერს ერთდროულად ხომ ვერ გააკეთებენ. უზრდელობა და რამე თუ წერია ეს დაუყონებლივ იღებება. დანარჩენსაც გადაღებავენ“.

ახალგაზრდა, რომელმაც წარწერები გააკეთა, „სამხრეთის კარიბჭესთან“ ამბობს, რომ კეთილმოწყობამ ის ადგილები გადაღება, სადაც „სისტემა კლავს“ ეწერა.

„ადგილობრივი ხელისუფლებაც იმას ცდილობს, რომ ახალგაზრდებში პროტესტის მუხტი ჩაახშოს. ფაქტია რომ მხოლოდ იმ კედლებზე ღებავენ, სადაც სისტემის წინააღმდეგ გზავნილებია. ადგილები, სადაც მხოლოდ „ამ ცხოვრების დედაც“ წერია, ყველგან ხელუხლებელია. სხვა შინაარსის წარწერებს, რომელიც წლებია ახალციხის ქუჩის კედლებზეა, რატომ არ შლიან?“.

თბილისში 15 წლის მოზარდის გარდაცვალების შემდეგ, მსგავსი შინაარსის წარწერები, მთელი საქართველოს მასშტაბით გამოჩნდა. ახალციხეში წარწერები ცენტრალურ ქუჩებსა და საბარგო სადგურზე ახალგაზრდებმა 18 დეკემბერს გააკეთეს.

ლუკა სირაძე, რომელმაც თვითმკვლელობა სავარაუდოდ პოლიციაში მასზე განხორციელებული ფსიქოლოგიური ძალადობის გამო სცადა, იაშვილის კლინიკაში 17 დეკემბერს გარდაიცვალა. მოზარდი 11 დეკემბერს საცხოვრებელი კორპუსის მე-9 სართულიდან გადმოხტა.

ლუკა სირაძეს პოლიცია „მწვანე სკოლის“ შენობაში შეპარვასა და კედელზე წარწერის „ამ ცხოვრების დედაც“ გაკეთებას ედავებოდა.

ახალციხეში არქივის შენობის ღობე


ახალციხეში არქივის შენობის ღობე


ფარნავაზ მეფის ქუჩა



[რობი ზარიძე, ახალციხე]