‘შეცვალეთ საგზაო ნიშნებზე სომხური ალფაბეტით დატანილი წარწერები’ – საგზაო ახალქალაქის მერიას

დეპარტამენტი მერიას ამავე წერილში უთითებს, რომ კანონმდებლობის შესაბამისად საგზაო ნიშნებზე წარწერები მხოლოდ ქართულ და ინგლისურ ენებზე უნდა იყოს.

უწყება ახალქალაქში ბანერებზე არასწორად დატანილი სოფლების დასახელებების შესახებ მას შემდეგ დაინტერესდა, რაც ამის შესახებ „სამხრეთის კარიბჭემ“ სტატია გამოაქვეყნა. შესაბამისად, საავტომობილო გზების დეპარტამენტმა, გარდა იმისა, რომ მერიას სომხურ ენაზე გაკეთებული წარწერების მოხსნა დაავალა, აღნიშნული საკითხის შესწავლა თავადაც დაიწყო და თვითმმართველობას მუნიციპალიტეტის ადმინისტრაციულ საზღვრებში არსებული სოფლების დასახელებების შესახებ ინფორმაციის გადაგზავნა სთხოვა.

ახალქალაქში, გზის ის მონაკვეთი, სადაც სოფლის – ბაგაშენი, ტირკნა, ზაქვი – დასახელებები შეცომითაა დაწერილი, ბანერები საავტომობილო გზების დეპარტამენტის მიერ გამოცხადებულ ტენდერში გამარჯვებულმა შპს „AAB პროექტმა“ 2016 წელს დაამონტჟა.

"სარეაბილიტაციო სამუშაოების ფარგლებში გათვალისწინებული იყო საავტომობილო გზის სავალი ნაწილის, ხელოვნური ნაგებობების, საგზაო ნიშნების მოწყობის და სავალი ნაწილის მონიშვნის სამუშაოები. დასახელებები აბრებზე, „Dohwa Engineering Co.Ltd/korea“-ის მიერ შედგენილი პროექტის მიხედვით დაიწერა. აღნიშნული სამუშაოების კონტროლი და მისი საბოლოო მიღება განახორციელა საზედამხედველო ორგანიზაცია ერთობლივი საწარმო შპს „საავტომობილო გზების რეაბილიტაციისა და მოდერნიზაციის ზედამხედველობის დირექციამ“ და „Nivelt ingenieur GmbH“–მა, – ნათქვამია საგზაო დეპარტამენტიდან მიღებულ წერილში, თუმცა რატომ ჩაიბარეს ხარვეზებით შესრულებული სამუშაო ამის შესახებ უწყება არაფერს გვწერს.

ახალქალაქის მუნიციპალიტეტში ათობით სოფლის აბრაზე სოფლის დასახელებები შეცდომით წერია. აღნიშნულის შესახებ პირველად სოციალურ ქსელში პუბლიცისტმა კუკური მეტრეველმა დაწერა. იმ სოფლების გზებზე, რომლების მოვლა–პატრონობაც თვითმმართველობის მოვალეობაა, ამ საკითხის მოკვლევა ახალქალაქის მერიამ მანამდე დაიწყო, ვიდრე საზგაო დეპარტამენტიდან წერილს მიიღებდა.

[თინათინ ზაზაძე, ახალქალაქი]