"ახალციხის ციხის" დაუცველი კედლები

"ახალციხის ციხის" კედლებზე დიდი ხანია გაჩნდა სხვადასხვა სახის წარწერები, რომლებსაც ძირითადად ტოვებენ დამთვალიერებლები. ყველა წარწერის არსი ერთი და იგივეა, იგი ეხება დამწერის ვინაობას და საკონტაქტო ნომერს. წარწერები კედლებზე მატულობს, მიუხედავად იმისა, რომ ძეგლს იცავს მუზეუმის დაცვა და მონიტორინგის სამსახური.

როგორც მონიტორინგის სამსახურის ერთ-ერთი თანამშრომელი დავით ტაბატაძე აცხადებს, დაცვის და მონიტორინგის თანამშრომლები ცდილობენ, მაქსიმალურად გააკონტროლონ ყველაფერი. როგორც მან აღნიშნა, მონიტორინგს ციხეზე სულ 4 საგუშაგო აქვს. მას ევალება დამთვალიერებლების დახვედრა და დახმარება, თუ რაიმე შეკითხვა ექნებათ ბილეთებთან დაგკავშირებით და ტურისტულ ობიექტზე ქცევის წესების განმარტება.. „ვაფრთხილებთ, რომ დაუცველ ადგილზე ბავშვები არ უნდა ავიდნენ,“ - განაცხადა დავით ტაბატაძემ.

მონიტორინგის კომპეტენციაში შედის დამთვალიერებელთათვის უსაფრთხოების ყველა პირობის გაცნობა.

იმ შემთხვევაში, თუ ვინმეს შეამჩნევენ, რომ რაიმეს აზიანებს, მათ უფლებამოსილებაში არ შედის სადამსჯელო ღონისძიების გატარება. ამ შემთხვევაში ვიზიტორს ატოვებინებენ ტერიტორიას და, თუ ისეთი რამეა დაზიანებული, რაც ძეგლს ფინანსურ ზარალს აყენებს, მისი ანაზღაურება ხდება დამზიანებლის მიერ.

"ახალციხის ციხის" საზოგადოებასთან ურთიერთობის სამსახურის უფროსმა ლილი გოზალიშვილმა განაცხადა, რომ მონიტორინგის სამსახური აკონტროლებს დამთვალიერებლებს, თუმცა ყველა კოშკში თანამშრომლის დაყენება ძალიან რთულია. ჯერ-ჯერობით ვერც კამერებს აყენებენ ყველგან , რადგან ეს საკმაოდ დიდ თანხებთანაა დაკავშირებული.

მისი თქმით, ხშირად შეუმჩნევია ციტადელზე წარწერები და ერთადერთი ღონისძიება, რაც გაატარეს, შეძლებისდაგვარად წაშალეს ისინი.

"იმის მიუხედავად, რომ დაუცველი ადგილები ნაკლებადაა ციხეზე, შეუძლებელია, ასე დაწვრილებით გაკონტროლდეს დამთვალიერებელთა თითოეული ნაბიჯი. ბევრი რამ მათ თვითშეგნებაზეა დამოკიდებული. ახალგაზრდებმა, რომლებიც „უკვდავყოფენ საკუთარ ვიზიტს“ და აზიანებენ ძეგლს, უნდა გააცნობიერონ, რომ ეს მათი ისტორიაა, მათ ეკუთვნით და შესაბამისად უნდა მოუფრთხილდნენ, – ამბობს ლილი გოზალიშვილი.



[მარიამ ბარძიმაძე, ახალციხე]