ფოფხაძე: ‘დღეს ნაციონალურმა მოძრაობამ ბოლომდე დაიბრუნა სასამართლო სისტემა და მართლსაჯულება’

„ფაქტობრივად უზურპაციის პროცესი გაგრძელდა უზენაეს სასამართლოში. პარლამენტს პირდაპირი გზავნილი აქვს იურიდული კომიტეტიდან კლანს ჩააბარონ უზენაესი სასამართლო, ეს იმას ნიშნავს, რომ მართლსაჯულებას კარგავს ქართველი ხალხი, ჩვენ ვკარგავთ სამართლიანობის ყველანაირ იმედს, ჩვენ ვკარგავთ ლეგიტიმურ ხელისუფლებას და ვღებულობთ უზურპირებულ ხელისუფლებას“, – განაცხადა გედევან ფოფხაძემ იურიდიული კომიტეტის სხდომის დასრულების შემდეგ.

მისი თქმით, დღევანდელი გადაწყვეტილებით, ქვეყანაში სიმართლეს ვერავინ იპოვის: „მე ვუერთდებით ყველა იმ ჩემი კოლეგის პოზიციას, რომელიც ამბობს, რომ სააკაშვილმა დღეს გაიმარჯვა, დღეს სააკაშვილის ზეიმია, დღეს „ნაციონალურმა მოძრაობამ“ ბოლომდე დაიბრუნა სასამართლო სისტემა და მართლმსაჯულება. როგორც მოგვატყუეს პროპორციულ არჩევნებზე, აი ისეთი სიცრუე და ფარსია მთლიანად „ქართული ოცნება“, – განაცხადა დეპუტატმა ჟურნალისტებთან.

ფოფხაძე ამბობს, რომ მათ რჩებათ შეზღუდული ლეგიტიმური რესურსი იმისათვის, რომ იბრძოლონ: „მე მიმაჩნია რომ ეს იყო ძალიან ცინიკური გადაწყვეტილება. რაც დღეს ხდებოდა იურიდიულ კომიტეტზე – ფორმა, შინაარსი, ქცევა – ეს ყველაფერი იყო შეურაცხყოფა საზოგადოების. დღეს ბოლომდე დაიწვა „ოცნება“, ბოლომდე დაიღუპა. ნუ გგონიათ, რომ „ნაციონალური მოძრაობა“ მიშა სააკაშვილია, „ნაციონალური მოძრაობა“ არის ბიძინა ივანიშვილი. ჩვენ გვრჩება შეზღუდული ლეგიტიმური რესურსი იმისათვის, რომ ვიბრძოლოთ, რათა ქართველმა ხალხმა არ დაკარგოს სამშობლო“.

დღეს, 12 დეკემბერს პარლამენტის იურიდიულმა კომიტეტმა უვადოდ დასანიშნი 14 მოსამართლის სია დაამტკიცა. რეკომენდაცია არ გაუწიეს მხოლოდ: თამარ ალანიას, შოთა გეწაძეს, ზაზა თავაძეს, პაატა სილაგაძეს, ლაშა ქოჩიაშვილსა და გოჩა ჯეირანაშვილს.

[sknews.ge]