'ეს არის სწორი გადაწყვეტილება'– ფოფხაძე ივანიშვილის პოლიტიკაში დაბრუნებაზე

გედევან ფოფხაძე დღეს, 26 აპრილს "ქართული ოცნების" ლიდერების შეხვედრას არ დასწრებია.თუმცა ჟურნალისტებთან საუბარში, ბიძინა ივანისვილის პოლიტიკაში დაბრუნება დადებითად შეაფასა.

"ნამდვილად მიმაჩნდა და აქამდეც ვამბობდი, რომ ბიძინა ივანიშვილის დაბრუნება პოლიტიკურ სივრცეში გვაძლევს იმ დამატებით რესურსს, რაც მას გააჩნია, როგორც პოლიტიკოსს", - განაცხადა გედევან ფოფხაძემ.

მისივე თქმით, ივანიშვილის ეს ნაბიჯი, პარტიაში არსებულ გამოწვევებს ღირსეულ პასუხს გასცემს–"ამიტომ მე მგონია, რომ ეს არის ის სწორი გადაწყვეტილება, რომელიც უნდა გაკეთებულიყო“.

რაც შეეხება, გედევან ფოფხაძის "ქართული ოცნების" დატოვების საკითხს. მან ჟურნალისტებს განუცხადა, რომ ბიძინა ივანიშვილის პოლიტიკაში მოსვლის შემდეგ, მისი მიერ პარტიის დატოვება არასწორი იქნება.

"ბიძინა ივანიშვილის ფაქტორი იმდენად ცალსახა და ერთმნიშვნელოვანია ამ გუნდისთვის და მას ისეთი პოლიტიკური წონა აქვს, რომ, რა თქმა უნდა, მე ამ ფაქტორის გათვალისწინებით ვიმოქმედებ ამის შემდეგ. მიმაჩნია, რომ ამ ეტაპზე ჩემი მხრიდან ამ ნაბიჯის გადადგმა არასწორი იქნება, რომ წავიდე. ბიძინა ივანიშვილი მოვიდა და მე რატომ უნდა წავიდე?!"– განაცხადა ფოფხაძემ.

შეგახსენებთ, რომ ბიძინა ივანიშვილის პოლიტიკაში დაბრუნებაზე კომენტარი, საქართველოს პრემიერ–მინისტრმა "ქართული ოცნების" ლიდერების შეკრების შემდეგ განაცხადა. მისი თქმით, ბიძინა ივანიშვილი, რომელმაც პრემიერ-მინისტრის პოსტი ოფიციალურად 2013 წელს დატოვა, ახლა თანახმაა, რომ კვლავ პარტია “ქართული ოცნების” თავმჯდომარე გახდეს.

[sknews.ge]