‘ნაციონალებზე’ კი არა ქვეყნის განვითარებაზე უნდა ესაუბრა – ფოფხაძე ივანიშვილის ინტერვიუზე

„როდესაც პოლიტიკური ლიდერი საუბრობს, პოლიტიკურ მოცემულობაზე, რაც არის ქვეყანაში და თავისი საუბრის ძირითად ნაწილს უთმობს კონკრეტულ პოლიტიკურ ძალას, ამ შემთხვევაში „ნაციონალურ მოძრაობას“, არამგონია ეს ქართული პოლიტიკისთვის სწორი იყოს, მე მაინც მოლოდინი მქონდა ის ისაუბრებდა საქართველოზე და არა „ნაციონალებზე“, – ამბობს გედევან ფოფხაძე.

მისი თქმით, ბიძინა ივანიშვილს უნდა ესაუბრა, „თუ რა პერსპექტივა აქვს საქართველოს, რა პოლიტიკური როლი შეიძლება იკისროს თანამედროვე მსოფლიოში, ამ ნაწილში ფაქტობრივად ბიძინა ივანიშვილს არ უსაუბრია. კარგია გაგვეგო მისი კონკრეტული გზავნილები, თუ მას როგორ წარმოუდგენია საქართველო თანამედროვე პოლიტიკურ მოცემულობაში და როგორ წარმოუდგენია პერსპეტივაში საქართველოს განვითარება. ამან უკმარისობის გრძნობა გამიჩინა, და იმანაც, რომ ამბობ, რომ სამუშაო ადგილების შექმნა ძალიან რთულია და ათწლეულების საქმეა, მაგრამ არის საშუალება იაფი ბილეთები იყოს და სხვა ქვეყანაში წავიდნენ სამუშაოდ. ეს მე არ მიმაჩნია საქართველოს მოსახლეობისთვის გამოსავლად.
ხელისუფლებაში მოსვლიდან შვიდი წლის თავზე იმის თქმა, რომ ათწლეულების საქმეა ქვეყანაში საკმარისი სამუშაო ადგილების შექმნა, ეს არ არის იმ მოლოდინების პასუხი რაც საზოგადოებაში არის“.

„ოცნებიდან“ წამოსული და უკვე დამოუკიდებელი დეპუტატი მიიჩნევს, რომ „ნაციონალებზე“ საუბარი ჯერ კიდევ 2013 უნდა დასრულებულიყო: „არჩევნების შედეგებით ჩვენ ვთქვით რომ „ნაციონალების ხელისუფლება“ არის ცუდი, უნდა შეიცვალოს. მივიღეთ ამაზე ხალხის მხარდაჭერა, მერე უკვე ხალხი ელოდებოდა ჩვენ რას შევცვლიდით“.

გუშინ, 28 ნოემბერს ტელეკომპანია „იმედის“ საღამოს ეთერი „ქართული ოცნების“ ლიდერს, ბიძინა ივანიშვილს დაეთმო.

On.ge-ს დათვლით, ივანიშვილმა საათნახევრიან ინტერვიუში "ნაცები" და პარტიის სახელი მან 30-ზე მეტჯერ ახსენა. გარდა ამისა, მან დაახლოებით 40-ჯერ წარმოთქვა ექსპრეზიდენტის სახელი და სიტყვა "ბელადი".

“ქართული ოცნების” თავმჯდომარე და ექსპრემიერი ბიძინა ივანიშვილი აცხადებს, რომ 2 მილიონ სამუშო ადგილს უახლოეს 20 წელიწადში საქართველოში ვერც ერთი ეკონომიკა ვერ შექმნის და გამოსავალს ხედავს ევროპის განვითარებულ ქვეყნებში ლეგალურად დასაქმების შესაძლებლობის შექმნას.

ივანიშვილის თქმით, ხელისუფლება ამაზე აქტიურად მუშაობს და ვარაუდობს, რომ 2-3 წელიწადში ეს შესაძლებელი იქნება:
“ჩვენ შეგვიძლია და უკვე აქტიურად ვმუშაობთ ამაზე ევროპის განვითარებულ ქვეყნებთან. როგორც სახელმწიფო, ვაფორმებთ კონტრაქტებს და მივდივართ ამაზე, რომ შევავსოთ ის დეფიციტი, რა დეფიციტიც ევროპელებს აქვთ. მათ აქვთ სამუშო ადგილები, აკლიათ სამუშაო ძალა. ჩვენ არ გვაქვს სამუშაო ადგილები, ესაა ჩვენი ძირითადი პრობლემა. გაიხსენეთ პოლონეთი, ბალტიისპირეთის სამი ქვეყანა, ბულგარეთი – ასეთივე გაცლილია, როგორც საქართველო.

მმართველი გუნდის ხელმძღვანელის თქმით, ცუდია, რომ დაპირება, პროპორციულ სისტემაზე გადასვლის ვერ შეასრულა, თუმცა ამაში დრამატული არაფერია.

[sknews.ge]