ვალე–ახალციხის გზაზე სამი ადამიანი დაშავდა

შემთხვევა დილით მოხდა. „საბაჟოზე მუშაობენ და სამსახურში მიდიოდნენ. მანქანა გზიდან გადავარდა, როგორ მოხდა არ ვიცი. უფრო მეტად მძღოლი დაშავდა, 30 წლამდე გოგოა“,– გვითხრა ერთ–ერთი დაშავებულის ახლობელმა.

სასწრაფო სამედიცინო დახმარების ცენტრმა, დაშავებულები ახალციხის რეფერალურ ჰოსპიტალში გადაიყვანეს.

„მძღოლს აქვს თავის ტვინის შერყევა და რჩება კლინიკაში, ნევროპათოლოგის მეთვალყურეობის ქვეშ. ორს ზედაპირული დაზიანებები აქვს და დღესვე გავწერთ“,–გვითხრეს კლინიკაში.

შინაგან საქმეთა სამინისტრომ გამოძიება სსკ–ს 276 მუხლის მეორე ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

[მარიამ ბარძიმაძე, ახალციხე]