ვალე–ახალციხის გზაზე ავარია მოხდა

ავტოსაგზაო შემთხვევა დღეს, 14 ივლისს, დაახლოებით 17:00 საათზე მოხდა. საავტომობილო გზაზე მოძრავი მსუბუქი ავტომანქანა და „ვოლვოს“ მარკის სატვირთო, ერთმანეთს შეეჯახა.

შემთხვევის შედეგად, ორი მგზავრი დაზარალდა, ისინი სასწრაფო–სამედიცინო დახმარების ბრიგადამ ახალციხის საავადმყოფოებში გადაიყვანა.
„ერთი პაცინტი შემოიყვანეს, ქალბატონია, სტაბილურად არის ამ მომენტში. მიმდინარეობს კვლევები. რამდენად ღრმა დაზიანებები აქვს, გამოჩნდება კვლევებისას“, – ამბობს ახალციხის რეფერალური ჰოსპიტალის დირექტორი, ხათუნა კეკელაშვილი.

მეორე პაციენტი კლინიკა „იმედში“ მკურნალობს: „ერთი პაციენტია ჩვენთან, მენჯ–ბარძაყი აქვს დაზიანებული, საოპერაციოა თუ არა, რენდგენი აჩვენებს“, – განმარტავენ კლინიკაში.

შსს-ს ინფორმაციით, საქმეზე ძიება 276–ე მუხლის მეორე ნაწილით მიმდინარეობს. რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე ან მძიმე დაზიანება გამოიწვია.

[თაკო ფეიქრიშვილი, ახალციხე]