ახალციხე–ადიგენის გზაზე ავარიის შედეგად 4 ადამიანი დაშავდა

„მიცუბიში დელიკას“ ფირმის მანქანა ავარიაში დღეს, 15 ივლისს, დილით მოყვა. მანქანაში მყოფი ხუთი პირიდან ოთხი სასწრაფო სამედიცინო დახმარების ჯგუფებმა ახალციხის რეფერალურ ჰოსპიტალში გადაიყვანეს.

როგორც საავადმყოფოში ამბობენ, მათ შორის ერთი ამ წუთებში ქირურგიულ განყოფილებაში იმყოფება და მის სიცოცხლეს საფრთხე არ ემუქრება: „ბავშვი დილითვე გავწერეთ, დანარჩენებს კი მოტეხილობები აქვთ. დაკვირვების ქვეშ არიან და გამოკვლევები უტარდებათ“.

მომხდარზე შინაგან საქმეთა სამინისტრომ გამოძიება სისხლის სამართლის კოდექსის 276–ე მუხლის პირველი ნაწილით დაიწყო, რაც ავტოსაგზაო მოძრაობის წესების დარღვევას გულისხმობს.

[თამუნა უჩიძე, ახალციხე]