დღეს პარლამენტში გოჩა ჯეირანაშვილს მოუსმენენ

გოჩა ჯეირანაშვილი თბილისის სააპელაციო სასამართლოს სისხლის სამართლის საქმეთა პალატაში მოსამართლედ 2018 წლის იანვარში გადავიდა.

იგი 2009 წლის 28 დეკემბრიდან 2018 წლის იანვრამდე, ახალციხის რაიონული სასამართლოს თავმჯდომარე იყო. მანამდე წალკაში ასევე მოსამართლედ მუშაობდა. სასამართლომდე ჯეირანაშვილს 2002 წლიდან პოლიციაში სხვადასხვა, 2007 წლიდან 2009 წლამდე კი პროკურატურაში უფროს გამომძიებლის პოზიცია ეკავა.

ჯეირანაშვილს როგორც თავად ამბობს, ახალციხის რაიონულ სასამართლოში მუშაობის პერიოდში 3 000–ზე მეტი საქმე აქვს განხილული. მათ შორის ყველაზე მეტად ბორჯომის პოლიციელების, ე.წ. ხვედელიანის საქმე ახსოვს, რადგან მის მიერ მიღებულ გამამართლებელ განაჩენს საზოგადოების პროტესტი მოჰყვა: „ამ საქმეში მტკიცებულებები არ იყო, სხვა გადაწყვეტილებას ვერც სხვა მოსამართლე მიიღებდა. ეს გადაწყვეტილება კი მესამე ინსტანციის სასამართლომაც ძალაში დატოვა“.

საქართველოს პარლამენტის იურიდიულმა კომიტეტმა, უზენაესი სასამართლოს მოსამართლეობის კანდიდატების მოსმენა 23 სექტემბრიდან დაიწყო.

[sknews.ge]