ახალციხის რაიონული სასამართლოს თავმჯდომარე სააპელაციოში გადადის

ახალციხის რაიონული სასამართლოს მოსამართლე გოჩა ჯეირანაშვილი პოზიციას 18 იანვარს დატოვებს. იგი იუსტიციის უმაღლესი საბჭოს გადაწყვეტილებით თბილისის სააპელაციო სასამართლოს სისხლის სამართლის საქმეთა პალატაში მოსამართლედ დაინიშნა. ჯეირანაშვილი კოლეგებთან ერთად პირველი ინსტანციის სასამართლოების მიერ მიღებულ გადაწყვეტილებებს განიხილავს.

„კონკურსში მივიღე მონაწილეობა და იუსტიციის უმაღლესმა საბჭომ შემარჩია. გადაწყვეტილება უკვე მიღებულია“, – ამბობს ჯეირანაშვილი.
მისი წასვლის შემდეგ ახალციხის რაიონული სასამართლოს თავმჯდომარის მოვალეობას უხუცესი მოსამართლე გიორგი ლონდარიძე შეასრულებს.

„სასამართლოს პრაქტიკის მიხედვით, თავმჯდომარის პოზიციაზე მოსამართლეებს შეუძლიათ, რომ თავინათი კანდიდატურა დააყენონ, კანონით აქ კონკურსი არ ცხადდება. გადაწყვეტილებას თავმჯდომარის დანიშვნის შესახებ იუსტიციის უმაღლესი საბჭო მიიღებს“, – აცხადებს ჯეირანაშვილი.

იგი ახალციხის რაიონული სასამართლოს თავმჯდომარედ 2009 წლის 28 დეკემბერს დაინიშნა. მანამდე წალკაში ასევე მოსამართლედ მუშაობდა. სასამართლომდე ჯეირანაშვილს 2002 წლიდან პოლიციაში სხვადასხვა, 2007 წლიდან 2009 წლამდე კი პროკურატურაში უფროს გამომძიებლის პოზიცია ეკავა.

ჯეირანაშვილს როგორც თავად ამბობს, ახალციხის რაიონულ სასამართლოში მუშაობის პერიოდში 3 000–ზე მეტი საქმე აქვს განხილული. მათ შორის ყველაზე მეტად ბორჯომის პოლიცილებების, ე.წ. ხვედელიანის საქმე ახსოვს, რადგან მის მიერ მიღებულ გამამართლებელ განაჩენს საზოგადოების პროტესტი მოჰყვა: „ამ საქმეში მტკიცებულებები არ იყო, სხვა გადაწყვეტილებას ვერც სხვა მოსამართლე მიიღებდა. ეს გადაწყვეტილება კი მესამე ინსტანციის სასამართლომაც ძალაში დატოვა“.

ამჟამად ჯეირანაშვილს დაახლოებით 30 საქმე აქვს: „ისინი ჩემი წასვლის შემდეგ სხვა მოსამართლეებს გადაეწერებათ“.

ჯაირანაშვილი აცხადებს, რომ საქართველოს სასამართლოებს შორის ახალციხის რაიონული სასამართლო ერთ–ერთი მოწინავეა: „ამას პირველ რიგში გასაჩივრებული საქმეების მაჩვენებლით ვზომავ, რაც შვიდ პროცენტს არ აღემატება. ეს იმას ნიშნავს, რომ აქ მიღებულ გადაწყვეტილებას ენდობიან. გარდა ამისა, ჩვენთან საქმეები ყოველთვის ვადებში, მალე იხილებოდა“.

[თამუნა უჩიძე, ახალციხე]