ობიექტზე, სადაც მუშა დაიღუპა მშენებლობა განახლდა

შრომის უსაფრთხოების დეპარტამენტის მითითებების შესრულების შემდეგ კომპანია „ანაგმა“ სამუშაოები რამდენიმე დღის წინ განაახლა. ბაკურიანში, „კოხტა დეველოპმენტის“ კონტრაქტორ, კომპანია შპს „ანაგის“ ობიექტზე მუშის დაღუპვის შემდეგ დაახლოებით ორი თვე გავიდა.

შსს–ს ინფორმაციით, საქმეზე გამოძიება სისხლის სამართლის კოდექსის 240–ე მუხლის მეორე ნაწილით მიმდინარეობს, რაც სამთო, სამშენებლო ან სხვა სამუშაოების წარმოებისას უსაფრთხოების წესის დარღვევას გაულისხმობს, რამაც ადამინის სიცოცხლის მოსპობა გამოიწვია. აღნიშნული მუხლი ითვალისწინებს შინაპატიმრობას ექვსი თვიდან ორ წლამდე ან თავისუფლების აღკვეთას ვადით ორიდან ხუთ წლამდე, თანამდებობის დაკავების ან საქმინობის უფლების ჩამორთმევას ვადით სამ წლამდე ან უამისოდ.

კომპანიას ამ დრომდე შრომის პირობების ინსპექტირების დეპარტამენტის მხრიდან სანქციები არ დაკისრებია. მიმდინარეობს გამოძიება და დანიშნულია ექსპერტიზები.

„ჩვენთან უსაფრთხოებაზე პასუხისმგებელი პირი ლაშა ცხვარიაშვილია, მისთვის ბრალი არ წაუყენებიათ, რადგანაც გამოძიება ექსერტიზის დასკვნას ელოდება“, – განაცხადა „ანაგის“ შრომისა და უსაფრთხოების ტექნიკის სამსახურის უფროსმა ბადრი გელაძემ.

მშენებლობაზე სამუშაოები შეცვლილი სამუშაოთა მწარმოებელის ხელმძღვანელობით განახლდა.

ბადრი გელაძე ამბობს, რომ კორპუსის კარკასზე სამუშაოებს რამდენიმე დღეში დაასრულებენ: „პარკინგის ტერიტორიაც ჩვენ უნდა მოვაწყოთ, ვვარაუდობთ, რომ ნოემბრის 20–მდე დავასრულებთ“.

„კოხტა მიტარბში“, შპს „ანაგის“ ობიექტზე მუშა 16 აგვისტოს დაიღუპა. მომხდარის შემდეგ კომპანიამ შრომითი ინსპექტორების გადაწყევიტილებით სამუშაო პროცესი შეაჩერა.

[თორნიკე ზაზაძე, ბორჯომი]