შრომის ინსპექტირება: ‘ობიექტი, საიდანაც მუშა გადმოვარდა შემოწმებული არ იყო’

56 წლის კაცი ქედის მუნიციპალიტეტში, სოფელ ინაშარიძეებში ცხოვრობდა. იგი ბაკურიანში კერძო კომპანიის მრავალსართულიანი სახლის მშენებლობაზე იყო დასაქმებული. სავარაუდოდ, მას ფეხი დაუცურდა და სიმაღლიდან ამის გამო ჩავარდა.

შემთხვევის ადგილზე გამოძახებული იყო სასწრაფო-სამედიცინო სამსახური: „ბრიგადას მამაკაცი გარდაცვლილი დახვდა“.
ცხედარი ახალციხის პროზექტურაში, 16 აგვისტოს დაახლოებით 11:00 საათზე შეიყვანეს.

ადგილზე სიტუაციის შესასწავლად, შრომის პირობების ინსპექტირების დეპარტამენტის თანამშრომლებიც მუშაობენ.

კითხვაზე, იყო თუ არა ობიექტზე, შრომის უსაფრთხოების პირობები დაცული, დეპარტამენტის საზოგადოებასთან ურთიერთობის სამსახურში ამბობენ, რომ აქამდე ეს შენობა შემოწმებული არ იყო: „გეგმა-გრაფიკის მიხედვით მოწმდება ობიექტები. რადგან უბედური შემთხვევა დაფიქსირდა, ჩვენი მხრიდან მყისიერი რეაგირება იქნება. ინსპექტორები ჩავლენ და შეისწავლიან“, - ამბობს საზოგადოებასთან ურთიერთობის სამსახურის წარმომადგენელი სალომე გოგინაშვილი.

უწყებაში მშენებელი კომპანიის ვინაობას, ამ ეტაპზე არ ასაჯაროებენ: „ამის თქმის საშუალება ჯერ–ჯერობით არ გვაქვს. ინსპექტორები, რომ ჩავლენ უკვე ადგილზე, ყველა დეტალს, მათ შორის იმასაც, ვინ ახორციელებს ამ საქმიანობას, გეტყვით. შესაძლოა ქვეკონტრაქტორები იყვნენ“.

მუშის გარდაცვალების ფაქტზე მიმდინარეობს გამოძიება. შინაგან საქმეთა სამინისტროს ინფორმაციით, საქმეზე გამოძიება სისხლის სამართლის კოდექსის 240-ე მუხლის მეორე ნაწილით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც ადამიანის სიცოცხლის მოსპობა გამოიწვია.

[თორნიკე ზაზაძე, ბორჯომი]