შრომის ინსპექციამ აწყურში ხიდის მშენებლობაზე ხარვეზები გამოავლინა

შრომის, ჯანმრთელობისა და სოციალური დაცვის სამინისტროს შრომის ინსპექტირების დეპარტამენტის უფროსის ბექა ფერაძის განმარტებით, კომპანია ვალდებული იყო საფრთხეები და რისკები წინასწარ შეეფასებინა და უსაფრთხოების ნორმები დაეცვა.

„რისკის იდენტიფიცირება არის ის ამოსავალი წერტილი და ფუნდამენტი, რომელსაც უნდა დაეყრდნოს ნებისმიერი დამსაქმებელი სამუშაოს დაწყებამდე. კონკრეტული შემთხვევაში მიზეზი ის იყო, რომ კომპანია სამუშაოებს მაღალი ძაბვის ქვეშ აწარმოებდა და არ იყო დისტანცია დაცული. ჩვენ უშუალოდ სამუშაო პროცესი არ გვინახავს შესაბამისად 100 პროცენტიან ჭეშმარიტებაზე ვერ ვისაუბრებთ. ხარვეზები ფიქსირდება. ბუნებრივია, რომ დენი არ იყო გათიშული და ადამიანი ამიტომ გარდაიცვალა.“, – ამბობს ბექა ფერაძე.

მისი თქმით, შრომის ინსპექტირების ჯგუფის მიერ მომზადებული დასკვნა გამოძიებისთვის დამატებითი მტკიცებულება იქნება.

შინაგან საქმეთა სამინისტროში აცხადებენ, რომ საქმეზე გამოძიება კვლავ გრძელდება: „ჩატარებული კომპლექსური ექსპერტიზის დასკვნები გამოძიებისათვის ამ ეტაპზე უცნობია“.

შეგახსენებთ, რომ 2 ივლისს, სოფელ აწყურში, ხიდის მშნებელობაზე დასაქმებული მუშა დენის დარტყმის შედეგად გარდაიცვალა.

შსს მომხდარს სსკ–ის 240–ე მუხლის პირველი ნაწილით იძიებს, რაც სამშენებლო სამუშაოებისას უსაფრთხოების ნორმების დარღვევას გულისხმობს.

[მარიამ ბარძიმაძე, ახალციხე]