ასოციაცია ‘ტოლერანტი’ სკოლებს ენერგოეფექტურ ღუმელებს გადასცემს

როგორც „ტოლერანტის“ დირექტორი ცირა მესხიშვილი აცხადებს, აქციის ფარგლებში, რომლის მიხედვითაც სკოლებს ენერგოეფექტური ღუმელები ექნებათ, პირველ რიგში ერუშეთის დაცულ ტერიტორიაში შემავალი სოფლების უმრავლესობა ისარგებლებს.

„ღუმელებს რა თქმა უნდა ყველგან ვერ დავარიგებთ. სადაც გაზია შეყვანილი და სკოლა შეშას არ მოიხმარს, ისინი, დახმარებით ვერ ისარგებლებენ. შერჩეულ 15 სკოლას კი ეტაპობრივად გადავცემთ ღუმელებს, მსგავსი აქცია შესაძლოა შემდეგშიც გაგრძელდეს“, – ამბობს ცირა მესხიშვილი.

როგორც მესხიშვილი ამბობს, ღუმელები, რომლებსაც ასოციაცია სკოლებს გადასცემს, ენერგოეფექტურობით გამოირჩევიან. ღუმელები გერმანელი ინჟინერების მიერაა დაპროექტებული. სქელი თნუქისაგან დამზადებულ ღუმელს, შიგნით ცეცხლგამძლე აგური აქვს, რათა ტემპერატურა დიდი ხნის განმავლობაში შეინარჩუნოს.

სკოლებისთვის გამათბობლებს მეთუნუქე ლევან ბერიძე ამზადებს, მისი თქმით, ერთი ღუმელი 10-15 წელს იმუშავებს: „ღუმელი ისეა მოწყობილი რომ თავისუფლად გაათბობს ერთ სკოლას და ნაკლებ შეშასაც მოიხმარს“.

ასოციაცია „ტოლერანტის“ დირექტორი ამბობს, რომ პროექტი საპილოტეა: „ამით ვცდილობთ მოსახლეობას ვაჩვენოთ, რომ მსგავსი ღუმელებით მეტი სითბო მიიღებაა და შესაძლებელია ნაკლები შეშის დახარჯვა.“

ასოციაცია „ტოლერანტი“ აქციას, ბუნების დაცვის მსოფლიო ფონდის (WWF) კავკასიის ოფისის პროექტის „საქართველოში უნიკალური ტყეების კონსერვაცია დაცული ტერიტორიების დაარსების გზით“ ფარგლებში ახორციელებს.

[თორნიკე ზაზაძე, ახალციხე]