პარლამენტარის ძმამ და ახალქალაქის მერის წარმომადგენელმა იჩხუბეს

გამოცემა წერს, რომ „ქართული ოცნების“ დეპუტატის ძმასა და მერის წარმომადგენელს შორის სიტყვიერი დაპირისპირება ფიზიკურში გადაიზარდა. მომხდარის შემდეგ მკოიანი და კიდევ ერთი ადამიანი საავადმყოფოში გადაიყვანეს.

„პეტროსიანი ვარჯიშობდა, ამ დროს მანქანით გამოჩნდნენ მარტუნ მკოიანი და ახალქალაქის საკრებულოს თავმჯდომარის ნათესავი სააკ ირიციანი. როცა დაინახეს გევორქი, სიჩქარეს ძალით მოუმატეს და გვერდზე ჩაუარეს. ამის გამო პეტროსიანმა ხმამაღლა ყვირილი დაუწყო. მკოიანი გადმოვიდა მანქანიდან და უთხრა ვერ მიცანიო? შემდეგ დაიწყო ჩხუბი. მოგვიანებით ენზელ მკოიანის ხალხი, დაახლოებით 30 კაცი შეიკრიბა და უნდოდათ პეტროსიანზე და მის მეგობრებზე თავდასხმა, მაგრამ პოლიციამ გაანეიტრალა საქმე“, – ამბობს „სამხრეთის კარიბჭესთან“ „ნაციონალური მოძრაობის“ ახალქალაქის შტაბის ხელმძღვანელი აშოტ რაისიანი.

მარტუნ მკოიანმა და ენზელ მკოიანმა „სამხრეთის კარიბჭეს“ სატელეფონო ზარებს არ უპასუხეს. რაც შეეხება პეტროსიანს, რედაქციამ დაკავშირება ვერც მასთან შეძლო.

შინაგან საქმეთა სამინისტროში გვითხრეს, რომ მომხდართან დაკავშირებით საგამოძიებო მოქმედებები მიმდინარეობს.

გეორგ პეტროსიანი ყოფილი დეპუტატის, სამველ პეტროსიანის შვილია. სამველ პეტროსიანი 2012–2016 წლებში იყო „ნაციონალური მოძრაობის“ დეპუტატი პარლამენტში.

შეგახსენებთ, რომ ენზელ მკოიანის ძმაზე, მარტუნ მკოიანზე საქმე ძალადობის მუხლითაა აღძრული. 2018 წლის 30 ოქტომბერს ქალაქ ახალქალაქში, თამარ მეფის ქუჩაზე მდებარე "ნაციონალური მოძრაობის" შტაბთან ბრალდებულები ამავე პარტიის წარმომადგენლებს ფიზიკურად გაუსწორდნენ.

შემთხვევის შედეგად ოთხი პირი დაშავდა. დაპირისპირება კი წინა ღამით, ახალქალაქი–ნინოწმინდის მაჟორიტარი დეპუტატის ენზელ მკოიანის ძმის მარტუნ მკოიანის ბენზინ გასამართ სადგურებზე საპრეზიდენტო კანდიდატის სალომე ზურაბიშვილის პლაკატების ჩამოხევას მოჰყვა. „ქართული ოცნების“ წევრები ამბობენ, რომ პლაკატების ჩამოხევასთან ერთად, ენმ–ეს წევრებმა ბენზინგასამართ სადგურის თანამშრომლებს შეურაცხყოფაც მიაყენეს.

[მარიამ ბარძიმაძე, ახალქალაქი]