ახალქალაქში ენმ–ს წევრების ადმინისტრაციული საქმის განხილვა დაიწყო

ახალქალაქის რაიონულმა სასამართლომ,“ნაციონალური მოძრაობის“ წევრების აშოტ რაისიანისა და მიხეილ აგაბაბიანის წინააღმდეგ იმ ადმინისტრაციული საქმის განხილვა დაიწყო, რომლის მიხედვითაც, გამოძიება ენმ–ს წევრებს ბენზინ გასამართ სადგურზე სალომე ზურაბიშვილის პლაკატების ჩამოხევას და სიტყვიერ შეურაცხყოფას ედავება.

სხდომაზე ორი მოწმე, ბენზინ გასამართი სადგურის თანამშრომლები დაკითხეს, რომლებმაც 30 ოქტომბერს ღამით მომხდარი გაიხსენეს.

„მოწმეებმა, გამოძიებისას დაკითხვის დროს სხვა ჩვენება მისცეს და სასამართლოზე სხვა. მაშინ თუ ამბობდნენ, რომ რაისიანმა და აგაბაბიანმა მათ პირადად მიაყენეს შეურცხყოფა, ახლა თქვეს რომ ვითომ, 48 აგინებდნენ და ეს, მათი შეურცხყოფაც იყო“,–ამბობს აშოტ რაისიანისა და მიხაილ აგაბაბიანის ადვოკატი ეკა აბაშიძე.

მისივე თქმით, სხდომაზე ვიდეო ფაილების ნაწილიც გამოიკვლიეს, სადაც სიტყვიერი დაპირისპირება არ ჩანს–„აგაბაბიანი და რაისიანი მართლაც მიდიან ბენზინ გასამართ სადგურზე და ელაპარაკებიან თანამშრომლებს, მაგრამ იქ არ ჩანს რომ სიტყვიერად უპირისპირდებიან ერთმანეთს, ესეც მაგათ საწინააღმდეგოზე მეტყველებს“.

სასამართლოში, საქმეზე გამოძიება კიდევ ხუთამდე მოწმეს დაკითხავს. ადმინისტრაციული საქმის შემდეგი განხილვა 19 დეკემბერს გაიმართება.

შეგახსენებთ, რომ აშოტ რაისიანი და მიხეილ აგაბაბიანი 30 ოქტომბერს, „ნაციონალური მოძრაობის“ ოფისთან, „ქართული ოცნების“ წევრებთან დაპირისპირების შედეგად დაშავდნენ. დაპირისპირება კი წინა ღამით, ახალქალაქი–ნინოწმინდის მაჟორიტარი დეპუტატის ენზელ მკოიანის ძმის მარტუნ მკოიანის ბენზინ გასამართ სადგურებზე საპრეზიდენტო კანდიდატის სალომე ზურაბიშვილის პლაკატების ჩამოხევას მოჰყვა.

[ლუბა გიორგაძე, ახალქალაქი]