ახალქალაქში ენმ–ს წევრების საქმეზე ვიდეო–მტკიცებულებები გამოიკვლიეს

„ნაციონალური მოძრაობის“ წევრების ადმინისტრაციულ საქმეზე დღეს, 19 დეკემბერს იმ ბენზინგასამართი სადგურის თანამშრომელი დაკითხეს, რომელსაც გამოძიების მტკიცებით, რაისიანმა და აგაბაბიანმა სიტყვიერი შეურაცხყოფა მიაყენეს.

„მოწმე პირველი გამოკითხვის დროს სხვა რამეს ამბობდა, სასამართლოში კი განსხვავებული ჩვენება მისცა. მისი ნათქვამიდან არ დასტურდება, რომ რაისიანმა და აგაბაბიანმა მას რაიმე შეურაცხყოფა მიაყენეს“, – ამბობს ენმ–ს წევრების ადვოკატი ეკა აბაშიძე.

დღესვე სხდომაზე ის ვიდე–მკტიცებულებები გამოიკვლიეს, რომლებიც ბენზინგასამართი სადგურის ვიდეო–თვალის ჩანაწერებიდან ამოიღეს.
ეკა აბაშიძის თქმით, მისი დაცვის ქვეშ მყოფების მხირდან სამართალდარღვევა არც აღნიშნული ვიდეო–მტკიცებულებებით დადასტურდა.
პროცესი, დაახლოებით, ორ საათს გაგრძელდა. მომავალი სხდომა კი ხვალ, 20 დეკემბერს მოწმეების დაკითხვით გაგრძელდება.

შეგახსენებთ, რომ აშოტ რაისიანსა და მიხაილ აგაბაბინს გამოძიება წვრილმან ხულიგნობას ედავება. 30 ოქტომბერს, „ნაციონალური მოძრაობის“ ოფისთან, „ქართული ოცნების“ წევრებთან დაპირისპირების შედეგად დაშავდნენ. დაპირისპირება კი წინა ღამით, ახალქალაქი–ნინოწმინდის მაჟორიტარი დეპუტატის ენზელ მკოიანის ძმის მარტუნ მკოიანის ბენზინ გასამართ სადგურებზე საპრეზიდენტო კანდიდატის სალომე ზურაბიშვილის პლაკატების ჩამოხევას მოჰყვა. „ქართული ოცნების“ წევრები ამბობენ, რომ პლაკატების ჩამოხევასთან ერთად, ენმ–ეს წევრებმა ბენზინგასამართ სადგურის თანამშრომლებს შეურაცხყოფაც მიაყენეს.

[ლუბა გიორგაძე, ახალაქლაქი]