ბორჯომში, კედლის ჩამონგრევის შედეგად, 2 ადამიანი დაშავდა

შემთხვევა ორ ოქტომბერს, დღის მეორე ნახევარში მოხდა. ააიპ კულტურის და ხელოვნების ცენტრის დირექტორი ნუნუ ხოლუაშვილი კედლის ჩამონგრევის დეტალებს იხსენებს.

„კედლი, რომელიც ჩამოინგრა ადრე ფანჯარა იყო და ამოუშენებიათ. თანამშრომლებმა გადაწყვიტეს რომ ცეკვის ტანსაცმელი გაემზიურებინათ და კედელზე არსებულ კაუჭებზე თოკი გააბეს, შემდეგ თოკს დაეკიდნენ, იმის შესამოწმებლად გაუძლებდა თუ არა სიმძიმეს, სწორედ მაგიტომ გადმოინგრა“, – ამბობს ხოლუაშვილი.

კედლის ჩემონგრევის შედეგად ორი ადამიანი დაშავდა. დაშავებულები ბორჯომის საავადმყოფოში შეიყვანეს. კლინიკის ხელმძღვანელის ირაკლი დიასამიძის თქმით, კაცს ოპერაცია ჩაუტარდა, ხოლო გოგონა კი შემდგომი კვლევებისთვის თბილისში გადაიყვანეს.

„კაცს ფეხი აქვს მოტეხილი და ჩავუტარეთ ოპერაცია, იგი კლინიკაში რჩება. რაც შეეხება გოგონას მას ხერხემლის დაზიანება ჰქონდა და თბილისში გადაიყვანეს, ნეირო ქირურგთან გადავამისამართეთ“, – ამბობს დიასამიძე.

ფაქტზე შინაგან საქმეთა სამინისტრომ გამოძიება სსკ–ს 124 მუხლით დაიწყო, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით.

ამბის მოკვლევას უფრო დაწვრილებით "სამხრეთის კარიბჭე" ცდილობს. დეტალებს მოგვიანებით მოგაწვდით.

ააიპ კულტურის და ხელოვნების ცენტრის დირექტორის ნუნუ ხოლუაშვილის განმარტებით, მოსწავლე–ახალგაზრდობის სახლში 200–მდე მოსწავლე სწავლობს. კედლის გადმონგრევის დროს მოსწავლეები შენობაში არ იმყოფებოდნენ.

[მარიამ ბარძიმაძე, ბორჯომი]