ბორჯომში კედლის ჩამონგრევისას დაშავებულ გოგოს ოპერაცია გაუკეთეს

ჩამონგრეულ კედელში მოყოლილი 22 წლის გოგო თბილისში რეგიონულ ჰოსპიტალში მკურნალობდა. როგორც დაშავებული გოგოს დედა, გვეუბნება მის შვილს მე–12 მალა ჰქონდა დაზიანებული, რის გამოც ოპერაცია დასჭირდა.

„ერთი ოპერაცია გაუკეთეს, სიცხეებიც ჰქონდა. ახლა ნორმალურადაა, გავლაც შეძლო“, – ამბობს დაშავებული გოგოს დედა.

მისივე თქმით, ოპერაციის შემდგომი პერიოდისთვის მის შვილს მკურნალობა დასჭირდება, რისთვისაც აპირებს მერიას მიმართოს.

ბორჯომის მუნიციპალიტეტის მერიაში გვითხრეს, რომ დაშავებულს ფინანსურად დაეხმარებიან.

„საჭიროების მიხედვით, რაც დასჭირდებათ ჩვენ დავუფინანსებთ, როგორც მედიკამენტოზურ ასევე სტაციონარულ მომსახურებას“, – გვითხრეს მერიაში.

ბორჯომის მოსწავლე–ახალგაზრდობის სახლში, კედლის ჩამონგრევისას, დარაჯი და ერთ–ერთი თანამშრომლის შვილი დაშავდა. 70 წლამდე კაცს ფეხი მოსტყდა, 22 წლის გოგოს კი ხერხემალი დაუზიანდა.

შემთხვევა ორ ოქტომბერს, დღის მეორე ნახევარში მოხდა. ფაქტზე შინაგან საქმეთა სამინისტრომ გამოძიება სსკ–ს 124 მუხლით დაიწყო, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით.

[მარიამ ბარძიმაძე, ბორჯომი]