პრეზიდენტის ადმინისტრაციის მიერ დაკვეთილი კვლევის შედეგებით ქვეყნის ეკონომიკა სუსტია

ამერიკული კომპანიის „გრინბერგ, ქუინლან, როზნერ რისერჩის“ (Greenberg, Quinlan, Rosner Research) კვლევის მონაცემებით, იმ ადამიანების რაოდენობა, ვინც ფიქრობს, რომ ქვეყანა სწორი მიმართულებით ვითარდება, მიმდინარე წლის მაისის შემდეგ 58%-დან 45%-მდე შემცირდა. ხოლო, იმ ადამიანების რიცხვი, ვინც საპირისპიროდ ფიქრობს, 20%-დან 36%-მდე გაიზარდა.

მაისის შემდეგ იმ ადამიანების რიცხვიც გაიზარდა, ვინც ფიქრობს, რომ საქართველოს ეკონომიკა სუსტია. თუ მაისში ამ რესპონდენტების რიცვი 70%-ით განისაზღვრებოდა, ახლა მათი რაოდენობა 76%-ია. ხოლო მათი რიცხვი, ვინც მიიჩნევს რომ ქვეყანაში ეკონომიკა ძლიერია, 22%-დან 18%-მდე შემცირდა.

რაც შეეხება სამუშაო ადგილებს, გამოკითხულთა 29% ფიქრობს, რომ მის ირგვლივ სამუშაო ადგილებისადმი ხელმისაწვდომობა უარესდება, ხოლო 8% მიიჩნევს, რომ უმჯობესდება.

ამერიკული კომპანიის „გრინბერგ, ქუინლან, როზნერ რისერჩის“ მიერ, პირისპირი ინტერვიუების გზით, საქართველოს მთელს ტერიტორიაზე 1204 რესპონდენტი გამოიკითხა. შერჩევითი ცდომილების ზღვარი +/-2-3 პროცენტს შეადგენს. კვლევა ტარდებოდა 15-21 სექტემბერს. აღნიშნულმა კომპანიამ საზოგადოებრივი აზრის კვლევა საქართველოს პრეზიდენტის ადმინისტრაციის დაკვეთით ჩაატარა.

[Sknews.ge]