NDI: მოსახლეობის 33% ფიქრობს, რომ ქვეყანა არასწორი მიმართულებით ვითარდება

ეროვნულ–დემოკრატიული ინსტიტუტის (NDI) კვლევა, დღეს, 27 ივლისს გამოქვეყნდა. კვლევის პირველი თავი ქვეყნის მიმართულებას და ეროვნული საკითხებს ეხება. მის თანახმად, მოსახლეობის უმრავლესობა კვლავ მიიჩნევს, რომ ქვეყანა საერთოდ არ იცვლება (34 პროცენტი) ან არასწორი მიმართულებით ვითარდება (33 პროცენტი), მაშინ როდესაც მოსახლეობის მეოთხედი (25 პროცენტი) ფიქრობს, რომ ქვეყანა სწორი მიმართულებით ვითარდება.



აქედან, უმცირესობათა დასახლებებში 26% აცხადებს, რომ არ იცის საქართველო სწორი მიმართულებით ვითარდება თუ არა, ასევე 26 % ამბობს, რომ ქვეყანა საერთოდ არ იცვლება, 25 % მიიჩნევს, რომ საქართველო სწორი მიმართულებთ ვითარდება;

კვლევის თანახმად გადაუწყვეტელი ამომრჩევლები ქვეყნის მდგომარეობას ნაკლებად პოზიტიურად აფასებენ. თუმცა ისინი არ არიან გამორჩეულად ნეგატიურები; უბრალოდ ფიქრობენ, რომ საქართველო საერთოდ არ იცვლება.

კერძოდ, გადაუწყვეტელი ამომრჩევლების 38% ფიქრობს, რომ საქართველო საერთოდ არ იცვლება, 33% ფიქრობს, რომ საქართველო არასწორი მიმართულებით ვითარდება, 9%–ს კითხვაზე პასუხი არ აქვს და მხოლოდ 19% ფიქრობს, რომ საქართველო სწორი მიმართულებით ვითარდება.
რაც შეეხება მათ, ვინც უკვე გადაწყვიტა, არჩევნებში რომელ პოლიტიკურ ძალას უჭერს მხარს, 34% ფიქრობს, რომ საქართველო სწორი მიმართულებით ვითარდება, 28%–ის აზრით, საქართველო საერთოდ არ იცვლება, 34% ამბობს, რომ საქართველო არასწორი მიმართულებით ვითარდება და 4%–ს კითხვაზე პასუხი არ აქვს.

NDI-ს კვლევა 8 ივნისიდან 6 ივლისის პერიოდში ჩატარდა. გამოიკითხა 4,113 რესპონდენტი. კვლევაში საშუალო ცდომილების ზღვარი არის +/- 2,1%. კვლევა დაფინანსებულია შვედეთის საერთაშორისო განვითარების და თანამშრომლობის სააგენტოს (Sida) მიერ

[sknews.ge]