NDI: 66% ფიქრობს, რომ საქართველოს ეკონომიკა ცუდ მდგომარეობაშია

უფრო კონკრეტულად, იმ 66%–დან, რომელიც ფიქრობს, რომ საქართველოს ეკონომიკა ცუდ მდგომარეობაშია, 26% ფიქრობს ეს მდგომარება „ძალიან ცუდია“, 40% კი მიიჩნევს, რომ „ცუდია“.

რაც შეეხება გეოგრაფიულ გადანაწილებას, როგორც ჩანს, ქვეყნის ეკონომიკურ პრობლემებს განსაკუთრებით მძაფრად ქალაქებში აღიქვამენ. ქალაქებში მხოლოდ 1% ფიქრობს, რომ ქვეყანას კარგი ეკონომიკური მდგომარეობა აქვს, 77% კი ამბობს, რომ ცუდი მდგომარეობა აქვს. სოფლად ეკონომიკის მდგომარეობა მოსწონს 2%–ს და უკმაყოფილოა 61%.

ქვეყის ეკონომიკური მდგომარეობას საშუალოდ აფასებს გამოკითხულთა 29%. (ქალაქში 20%, სოფლად კი 34%).

რაც შეეხება უმცირესობათა დასახლებებს, 8% ფიქრობს, რომ მდგომარეობა კარგია, 47%–ის აზრით ეს მდგომარეობა შეესაბამება საშუალო მაჩვენებელს, 35% კი ფიქრობს, რომ ცუდია.



მათგან, ვინც ეკონომიკა შეაფასა „ცუდ“ ან „ძალიან ცუდ“ მაჩვენებელზე, 81% მიიჩნევს, რომ ეკონომიკური პრობლემების გამომწვევი არის ახლანდელი ხელისუფლების შეცდომები, 59% ფიქრობს, რომ მიზეზი არის წინა მთავრობის შეცდომები და 53%–ს მიაჩნია, რომ მიზეზი გლობალური ეკონომიკური პრობლემებია.

გამოკითხულთა მხოლოდ 1% ელოდება, რომ მომდევნო 12 თვის განმავლობაში მისი ოჯახის ეკონომიკური მდგომარეობა ძალიან გაუმჯობესდება, 19% ფიქრობს, რომ ნაწილობრივ გაუმჯობესდება, იგივე დარჩება 48%–სთვის, ნაწილობრივ გაუარესებას ელოდება 13%, ძალიან გაუარესების მოლოდინშია 4%, 16%–ს კი წინასწარი პროგნოზი არ აქვს.

ამავე კვლევის მიხედვით, გასულ თვეში ოჯახების უმეტესობის საშუალო შემოსავალი იყო 261–დან 400 ლარამდე (24%), 151–260 ლარი იყო 20%–ის შემოსავალი, 401–დან 800 ლარამდე ჰქონდა 18%–ს, 801–დან 1200 ლარამდე – 7%–ს და 1200 ლარზე მეტი შემოსავალი ჰქონდა მხოლოდ 3%–ს.

კითხვაზე, თქვენს ოჯახს, რომ მოულოდნელად დასჭირდეს უპროცენტოდ 300 ლარის სესხება, შეძლებთ თუ არა, 31% ფიქრობს რომ შეძლებს, 61% ამბობს, რომ ვერ შეძლებს და 4%–მა არ იცის.



საზოგადოების განწყობის შესახებ NDI-ს კვლევა დღეს, 11 აპრილს გამოქვეყნდა. კვლევა 23 თებერვლიდან 14 მარტის პერიოდში ტარდებოდა. წარმომადგენლობითი შერჩევით ქვეყნის მასშტაბით 3900 ინტერვიუერი გამოიკითხა. საშუალო ცდომილების ზღვარი +/- 1,6%–ია. კვლევა შვედეთის საერთაშორისო განვითარების და თანამშრომლობის სააგენტოს (შიდა) მიერაა დაფინანსებული.

[ნინო ნარიმანიშვილი, ახალციხე]