საფინანსო სამსახურმა ახალციხეში ბიზნესმენი ოთარ თათეშვილი დააკავა

„სამხრეთის კარიბჭეს“ ინფორმაციით, საქმე ეხება 2013 წელს, ახალციხეში, ქუჩების მოასფალტებას.

ახალციხეში ქუჩების: სარაჯიშვილის, ხაშურის, მარჯანიშვილის, წმინდა დავითისა და კონსტანტინეს, პეტრიწის, გვარამაძის, სააკაძის და მებაღიშვილის გზების სარეაბილიტაციო სამუშაოების უზრუნველყოფაზე, ტენდერი, ახალციხის მუნიციპალიტეტის გამგეობას 2013 წლის 29 ივლისს აქვს გამოცხადებული. როგორც ელექტრონული შესყიდვის ვებგვერდიდან ირკვევა, ტენდერი 1.927.600 ლარზე იყო გამოცხადებული. ტენდერში მხოლოდ ერთი პრეტენდენტი, ოთარ თათეშვილის სამშენებლო კომპანია, შპს „არალი“ მონაწილეობდა და მან ტენდერი ამავე, ანუ, 1.927.600 ლარით მოიგო.

შპს „არალთან“ ხელშეკრულება 2013 წლის 11 სექტემბერსაა გაფორმებული. ხელშეკრულების მიხედვით, ამ სამუშაოს შესასრულებლად, კომპანიას ორი თვის ვადა ჰქონდა, – 2013 წლის 11 ნოემბრამდე.

ახალციხეში ქუჩების: სარაჯიშვილის, ხაშურის, მარჯანიშვილის, წმინდა დავითისა და კონსტანტინეს, პეტრიწის, გვარამაძის, სააკაძის და მებაღიშვილის გზების სარეაბილიტაციო სამუშაოების უზრუნველყოფა, საქართველოს რეგიონებში განსახორციელებელი პროექტების ფონდიდან იყო დაფინანსებული.

„სამხრეთის კარიბჭეს“ ინფორმაციით, საქმე სისხლის სამართლის 182–ე, მითვისება ან გაფლანგვის მუხლითაა აღძრული. დაკავებულის აღკვეთის ღონისძიებაზე ახალციხის რაიონული სასამართლო ამ წუთებში მსჯელობს.

[sknews.ge]