ახალციხეში, კანანელის ქუჩაზე, კანალიზაცია ამოდის

ადილობრივების თქმით, წყალი, დაახლოებით, 3–4 დღეა ამოდის. მათ არაერთგზის მიმართეს წყლის კომპანიას, თუმცა, შეკეთების მცდელობის მიუხედავად, დაზიანება ვერ აღმოიფხვრა. მიმდებარე ტერიტორიაზე კი ფურნეა, სადაც პური და სხვადასხვა ცომეული ცხვება.

„ვერ ვხვდები, როგორ აკეთებენ ისე, რომ მალევე ფუჭდება. მანდ არის კანალიზაცია და იჭედება. მოვლენ კომპანიიდან, „პროულკას“ შეუჩხიკინებენ და მიდიან. აგერ წინ ფურნეა და პური ცხვება, ასეთ ანტისანიტარიაში“, – ამბობს კანანელის ქუჩის მცხოვრები ალბერტ მალხასიანი.

„სამხრეთის კარიბჭე“ საქართველოს გაერთიანებული წყალმომარაგების კომპანიის სამცხე–ჯავახეთის ფილიალის უფროსს ბესო ფილაურს დაუკავშირდა. მისი თქმით, ადგილზე უკვე გააგზავნა ჯგუფი, რომელიც შეეცდება, პრობლემა მოავაროს. ფილაური ამბობს, რომ 2019–2020 წლებში ქალაქ ახალციხეში წყალანირების სისტემის რეაბილიტაცია უკვე გეგმაშია.

„სათითაოდ ყველა ქუჩაზე მილის შეკეთაბზე და რეაბილიტაციაზე ხომ ვერ გამოვაცხადებთ ტენდერს. გეგმაშია, რომ მომავალ წელს მთლიანად უნდა მოწესრიგდეს ეს სისტემა. ახლაც კანანელზე გავიდა ჯგუფი და ნახავენ პრობლემას“, – ამბობს ფილაური.



[მარიამ ბარძიმაძე, ახალციხე]