ახალციხეში დევნილების რეგისტრაცია მიმდინარეობს

დევნილების რეგისტრაცია ახალციხის მუნიციპალიტეტის საკრებულოს საკონფერენციო დარბაზში მიმდინარეობს. დევნილებმა რეგისტრაციისთვის პირადობის მოწმობა, დევნილის მოწმობა და არასრულწლოვნების შემთხვევაში დაბადების მოწმობს ორიგინალი უნდა წარადგინონ. კომისიას მობილური ჯგუფიც ჰყავს, რომელიც იმ პირებს, ვისაც გადაადგილება არ შეუძლია, ბინაზე ემსახურება.

რეგისტრაციის დროს დევნილები კომისიის წევრის რამდენიმე კითხვას პასუხობენ: ვისთან ცხოვრობენ, ვის ეკუთვნის ბინა, მუშობს თუ არა და იცის თუ არა უცხო ენა.

გუშინდელიდან დღემდე ახალციხეში რეგისტრაცია 131-მა დევნილმა გაიარა. დევნილთა სარეგისტრაციო კომისიის ხელმძღვანელი თამარ ცხადაძე ამბობს, რომ იმ დევნილების დასარეგისტრირებლად, რომლებიც ამ ეტაპზე საქართველოში არ იმყოფებიან, სამი დღის მერე სამინისტრო კომისიის წევრებს ისევ გამოაგზავნის.

იძულებით გადაადგილებულ პირთა რეგისტრაცია ახალციხეში გუშინ, 30 სექტემბერს დაიწყო და ხვალ, 2 ოქტომბერს დასრულდება. რეგისტრაცია გაიარეს ადიგენსა და ახალქალაქში მცხოვრებმა დევნილებმაც.

აფხაზეთიდან დევნილმა ლელა კორთხონჯიამ რეგისტრაცია უკვე გაიარა. სამსულიანი ოჯახი ყოფილ სანიტარულ ეპიდემიოლოგიური სადგურის შენობაში ცხოვრობს.

„ხუთი წელია ამ შენობაში ვცხოვრობ, მანამდე ნაქირავებ ბინაში ვცხოვრობდი. რეგისტრაცია უკვე გავიარე და იმედი მაქვს, რომ ფართს დამიკანონებენ“,- ამბობს ლელა კორთხონჯია.

საქართველოს მასშტაბით, დევნილთა სავალდებულო რეგისტრაცია პირველ აგვისტოს დაიწყო და 27 დეკემბრამდე გაგრძელდება.

[მანანა სარაშვილი, ახალციხე]