არლის მაჟორიტარობისთვის ჯერ არცერთი კანდიდატია რეგისტრირებული

27 ოქტომბრის შუალედური არჩევნები სამცხე-ჯავახეთში მხოლოდ ადიგენის ოლქში, #3 არლის საარჩევნო უბანზე გაიმართება. ამომრჩევლებმა სოფლის მაჟორიტარი დეპუტატი უნდა აირჩიონ.

ამ ეტაპზე, საინიციატივო ჯგუფებისთვის კანდიდატის წარდგენის ვადა ამოწურულია. #38 საოლქო საარჩევნო კომისიაში არცერთი კანდიდატია რეგისტრირებული.

კანდიდატის წარდგენის ვადა პოლიტიკურ პარტიებს 27 სექტებრამდე აქვთ.

რაც შეეხება საარჩევნო პროცედურებს, 13 სექტემბერს საოლქო საარჩევნო კომისიამ საუბნო საარჩევნო კომისიის ექვსი წევრი უკვე შეარჩია. კომისიის კიდევ ექვს წევრს დასანიშნად, უფლებამოსილი პარტიები საოლქოს თავად წარუდგენენ.

„საოლქო საარჩევნო კომისიამ ჯერ კონკურსი გამოაცხადა და შემდეგ აირჩია საუბნო საარჩევნო კომისიის ექვსი წევრი. ახლა პარტიები დანიშნავენ საკუთარ წარმომადგენლებს. 27 სექტემბრამდე გაიმართება პირველი სხდომა და ამის შემდეგ, საუბნო საარჩევნო კომისიის წევრებს ექნებათ უფლება-მოსილება“, - ამბობს #38 საოლქო საარჩევნო კომისიის თავმჯდომარე ჯაბა მაჭარაშვილი.

ადიგენის მუნიციპალიტეტის სოფელ არალში შუალედური არჩევნები იმის გამო იმართება, რომ 2019 წლის ხუთ აპრილს, სოფლის მაჟორიტარი დეპუტატი ლაზარე ჩილინგარაშვილი ავადმყოფობის შედეგად გარდაიცვალა. მას საკრებულოში საფინანსო–საბიუჯეტო, ეკონომიკისა და ქონების მართვის კომისიის თავმჯდომარის პოსტი ეკავა. ლაზარე ჩილინგარაშვილმა მაჟორიტარობის მანდატი 2017 წლის ადგილობრივი თვითმმართველობის არჩევნებზე მოიპოვა.

დაახლოებით ექვსი თვეა არალს ადიგენის საკრებულოში დეპუტატი არ ჰყავს.

სოფელში სულ 1 467 ამომრჩეველია რეგისტრირებული.

[თაკო ფეიქრიშვილი, ადიგენი]