არალში შუალედური არჩევნები 27 ოქტომბერს გაიმართება

შუალედური არჩევნები ადიგენის მუნიციპალიტეტის არლის თემში, ლაგოდეხის მუნიციპალიტეტის აფენის თემსა და მარტვილის მუნიციპალიტეტის კიწიის თემში ჩატარდება.

შესაბამისი განკარგულება კომისიის წევრებმა დღეს, ექვს სექტემბერს გამართულ სხდომაზე მიიღეს.

არჩევნები ჩატარდება შვიდ საარჩევნო უბანზე, სადაც საერთო ჯამში 6 776 ამომრჩეველია რეგისტრირებული.

საკრებულოების შუალედურ არჩევნებს ცესკოსთან ერთად ორგანიზებას ლაგოდეხის, ადიგენისა და მარტვილის საოლქო საარჩევნო კომისიები გაუწევენ. დღეს გამართულ სხდომაზე ცესკომ ლაგოდეხის, ადიგენისა და მარტვილის საოლქო საარჩევნო კომისიების დროებითი წევრების ვაკანტური ადგილების დასაკავებლად შესარჩევი კონკურსი გამოაცხადა. ცესკოს მიერ ასევე განისაზღვრა საუბნო საარჩევნო კომისიების წევრების შესარჩევი კონკურსის წესი, პირობები და ვადები.

სხდომაზე ცესკომ დაამტკიცა საარჩევნო ღონისძიებათა გრაფიკი, რომელშიც დეტალურად არის გაწერილი არჩევნებთან დაკავშირებული საქმიანობები და ვადები. ცესკომ დღესვე დაადგინა საინიციატივო ჯგუფების მიერ კანდიდატების წარსადგენად საჭირო ხელმოწერების მინიმალური ოდენობა (მაჟორიტარი კანდიდატის წარდგენა დადასტურებული უნდა იყოს არანაკლებ 50 ამომრჩევლის ხელმოწერით). სხდომაზე ასევე განისაზღვრა სახელმწიფოს მიერ შუალედური არჩევნებისთვის გამოყოფილი თანხის განაწილებისა და გამოყენების წესიც.

[sknews.ge]