პირველკლასელთა ელექტრონული რეგისტრაცია დაიწყო

საქართველოს განათლების სამინისტროს ინფორმაციით, რეგისტრაცია მმდინარეობს განათლების მართვის საინფორმაციო სისტემის სპეციალურ ვებგვერდზე www.registration.emis.ge. გარდა ამისა, რეგისტრაციის სისტემაზე გადასვლა შესაძლებელია სამინისტროს ვებგვერდზე განთავსებული ბმულიდან.

რეგისტრაცია 25 მაისს, 20:00 საათზე დასრულდება.

რეგისტრირებული მოსწავლეების დოკუმენტების მიღება 30 მაისიდან 10 ივნისის ჩათვლით გაგრძელდება.

სამინისტროს ცნობით, მოსწავლის დასარეგისტრირებელად, აუცილებელია რეგისტრაციის სისტემაში, შესაბამის ველებში მიუთითოთ ბავშვის პირადი ნომერი, სახელი, გვარი, მშობლის მონაცემები (სახელი, გვარი, პირადი ნომერი, მობილური ტელეფონის ნომერი, სურვილის შემთხვევაში ელექტრონული ფოსტა), აირჩიოთ სასურველი სკოლა და დააჭიროთ რეგისტრაციის ღილაკს.

რეგისტრაციის წარმატებით განხორციელების შემთხვევაში, რეგისტრაციის უნიკალურ კოდს რეგისტრატორი მიიღებს, როგორც მოკლე ტექსტური შეტყობინების, ასევე ელექტრონული ფოსტის საშუალებით.

I და II ეტაპზე მოსწავლის ჩასარიცხად აუცილებელი დოკუმენტების განსაზღვრულ ვადებში წარუდგენლობის შემთხვევაში, რეგისტრაცია ავტომატურად უქმდება.

[sknews.ge]