ახალციხის უნივერსიტეტში პირველკურსელთა რეგისტრაცია დაიწყო

უნივერსიტეტის ვებ-გვერდზე განთავსებული განცხადების თანახმად, პირველკურსელებმა რეგისტრაციისთვის შემდეგი საბუთები უნდა წარადგინონ.

ა) სრული ზოგადი განათლების დამადასტურებელი დოკუმენტი (დედანი);
ბ) პირადობის დამადასტურებელი მოწმობის/პასპორტის ასლი (დედნის წარმოდგენით);
გ) 1 ფოტოსურათი (3x4) და ელექტრონული ვერსია CD-ზე;
დ) სამხედრო აღრიცხვაზე ყოფნის დამადასტურებელი დოკუმენტის ასლი (ვაჟებისათვის);

რეგისტრაცია 21 სექტემბრამდე გაგრძელდება.

პირველი კურსის სტუდენტმა რეგისტრაციის ვადებშივე უნდა დაფაროს სწავლის სემესტრული საფასური.

2012-2013 სასწავლო წლისთვის უნივერსიტეტს საბაკალავრო პროგრამებზე 700 ვაკანსია ჰქონდა გამოცხადებული. 135 ადგილი იყო პროფესიული პროგრამებისთვის და 100 მაგისტრატურისთვის.

ახალციხის სახელმწიფო სასწავლო უნივერსიტეტის რექტორის მოადგილის ნიკოლოზ ახალკაცის თქმით, უნივერსიტეტს 308 პირველკურსელი ჰყავს. 283 -ბაკალავრიატში და 25 - ქართული ენის მოსამზადებელ პროგრამაზე.

მაგისტრანტებისა და პროფესიული პროგრამების სტუდენტთა რაოდენობა სექტემბრის ბოლოს, შიდა გამოცდების დასრულების შემდეგ გაირკვევა.

[ნინო ნარიმანიშვილი, ახალციხე]