ახალდაბაში სასმელ წყალში გრძელი ჭია ნახეს

ერთ–ერთმა დამსვენებელმა, რომელიც დაბა ახალდაბაში აგვისტოში იმყოფებოდა, ჭიის ვიდეო, რომელიც ონკანში სასმელ წყალს გადმოჰყვა საკუთარ ფეისბუქის გვერდზე ატვირთა. ვიდეო იხილეთ ბმულზე

როგორც დამსვენებელი „სამხრეთის კარიბჭესთან“ აცხადებს, სასმელ წყალში უცხო სხეულების აღმოჩენის პირველი შემთხვევა არ არის.

„ეს რაღაცა უბედურება მოყვება სასმელ წყალს და მშობლებმა მიაქციეთ პატარებს ყურადღება, შეიძლება არც დააკვირდნენ ისე დალიონ. აკონტროლეთ წყლის ფილტრაცია და ხარისხი, როგორ ჰაერსაც ვსუნთქავთ ისიც გვეყოფა თქვენი მოწამლვა აღარ გვჭირდება“,– წერს დამსვენებელი საკუთარ ფეისბუქ გვერდზე.

ახალდაბაში არსებული დაბინძურებული წყლის შესახებ „სამხრეთის კარიბჭეს“ არაერთი სტატია ააქვს მომზადებული, ბოლო მასალა რვა აგვისტოს მოამზადა.

ახალდაბაში სასმელი წყლის სათავე–ნაგებობის სარეაბილიტაციო სამუშაოები, 2017 წელს, მუნიციპალური განვითარების ფონდის დაფინანსებით შპს „ერისიმედმა“ და „კიევმეტრომშენმა“ შეასრულა. პროექტისთვის 743 928 ლარი დაიხარჯა, თუმცა სამუშაოების დასრულების შემდეგ, საფილტრი სადგურის ექსპლუატაციაში გაშვებისთანავე, წყლის სისტემის შიდა მილები დასკდა და საფილტრი სადგურის გადაკეტვა გახდა საჭირო.

მაშინ, ბორჯომის მუნიციპალიტეტის მერის მოადგილემ ბუბა ბერიძემ, „სამხრეთის კარიბჭესთან“ განაცხადა, რომ მილი, რომელიც სათავე ნაგეგბობას და საფილტრ სადგურს ერთმანეთთან აკავშირებს დაზიანებული იყო და წნევას ვერ უძლებდა. წელს მუნიციპალიტეტმა მილი გამოცვალა, თუმცა ჯერ საფილტრ სადგურს დაერთებული არ არის. დაერთების სამუშაოები კი მაშინ დასრულდება, როცა ახალდაბაში ტურისტული სეზონი დასრულდება.

[ლუბა გიორგაძე, ბორჯომი]