ახალდაბელები წყლის პრობლემის გამო გზის გადაკეტვით იმუქრებიან

დღეს, 14 სექტემბერს „სამხრეთის კარიბჭეში“ გამოქვეყნებული მასალის შემდეგ ახალდაბაში მუნიციპალური განვითარების ფონდის ზედამხედველობის სამსახურის ინჟინერი ზვიად პარკაძე ჩავიდა და მოსახლეობას შეხვდა.

როგორც მან ადგილობრივებთან საუბარში განაცხადა, სათავე ნაგებობაზე პროექტი ხარვეზების გარეშე შესრულდა და ახალდაბაში წყლის პრობლემის მიზეზი ამორტიზებული შიდა ქსელია: "სათავეზე თანამედროვე საფილტრი გაკეთდა, თუმცა აქ მოგროვილ წყლის წნევას მოძველებულმა სისტემამ ვერ გაუძლო. ძველი თუჯის მილები სკდება. სცადეს, სამჯერ დააბეტონეს, მაგრამ სამივეჯერ გასკდა. გამოსავლი ის იქნება, თუ მთლიანი სისტემა შეიცვლება და მაღალი წნევის მილებს ჩააწყობენ.სათავეს უნდა ჩაუტარდეს სრული რეაბილიტაცია. მდინარე რომ ადიდდება, მოაქვს ნაგავი და ცხაურს ბიდნავს“.

ადგილობრივების კითხვაზე, რატომ გაკეთდა მხოლოდ ფილტრები, როცა მთლიანი სისტემა მოძველებული და ავარიულია, პარკაძემ უპასუხა: "ეს ბორჯომის მერიას უნდა ჰკითხონ. საკითხი მერიას უნდა შეესწავლა, რადგან ისინი იყვნენ დამკვეთები“.



ადგილობრივებმა დღეს ცენტრალური გზის გადაკეტვა სცადეს, თუმცა მუნიციპალური განვითარების ფონდის წარმომადგენელი მოსახლოებას დაპირდა, რომ მომავალ კვირაში იმ თანამშრომელთან ერთად შეხვდება მოსახლეობას, ვინც უშუალოდ აკვირდებოდა ახალდაბაში წყლის სათავე–ნაგებობების სარეაბილიტაციო სამუშაოებს: „ჩვენთან ერთად იქნებიან ბორჯომის მერიის წარმომადგენლებიც, ავიდეთ სათავეზე და გავუშვათ წყალი, ნახავთ რომ პრობლემა მილებშია და არა ჩვენს მიერ აშენებულ სალექრებში“.

„თუ ჩვენი მოთხოვნები არ შესრულდება და წყლის პრობლემა არ მოგვარდება, სამშაბათს, 18 სექტემბერს ცენტრალურ გზას გადავკეტავთ“, – აცხადებენ ადგილობრივები.

დღეს მოსახლეობას ადგილობრივი ხელისუფლებიდან მხოლოდ მერის წარმომადგენელი ზვიად ბლიაძე და საკრებულოს დეპუტატი შეხვდნენ. როგორც მათ განმარტეს მერი და მისი მოადგილე ახალქალაქში იყვნენ.

„სამხრეთის კარიბჭეს“ ზარებს მუნიციპალიტეტის მერმა ლევან ლიპარტიამ არ უპასუხა, მოადგილე ბუბა ბერძეს კი ტელეფონი გამორთული ჰქონდა.

ახალდაბაში, სადაც 700 კომლი ცხოვრობს, სამ ათეულ წელზე მეტია ადგილობრივები წყლის პრობლემაზე ჩივიან. მიუხედავად იმისა, რომ სათავე ნაგებობის რეაბილიტაცია რვა თვის წინ დასრულდა, დასახლების ნაწილს წყალი ისევ არ მიეწოდება, ნაწილთან კი დაბინძურებული მოდის.

ახალდაბაში სათავენაგებობის სარეაბილიტაციო სამუშაოები, გასულ წელს, მუნიციპალური განვითარების ფონდის დაფინანსებით შპს „ერისიმედმა“ და „კიევმეტრომშენმა“ შეასრულა. პროექტისთვის 743 928 ლარი დაიხარჯა.

ბორჯომის მერიაში აცხადებენ, რომ აღნიშნული პროექტი ხარვეზებით შესრულდა და ამიტომ
არ ჩაიბარეს.



[თინათინ ზაზაძე, ბორჯომი]