ახალციხეში თვითმმართველობის განვითარების სტრატეგიაზე იმსჯელეს

კანონპროექტის პრეზენტაცია სამოქალაქო მოძრაობა მრავალენოვანი საქართველოს წარმომადგენელმა ჯაბა ნათენაძემ, ორგანიზაცია "დემოკრატ მესხთა კავშირის" საკონფერენციო დარბაზში გამართა. პრეზენტაციას სტუდენტები და არასამთავრობო ორგანიზაციების წარმომადგენლები ესწრებოდნენ.

„კანონპროექტის მთავარი მიზანია, მმართველობა გახდეს ორდონიანი: სამხარეო მუნიციპალური და ცენტრალური. ამ პრეზენტაციით მოქალაქეები გაიგებენ თუ რა იგეგმება სამომავლოდ მთავრობის მიერ“,- ამბობს ჯაბა ნათენაძე.

მისივე თქმით, დღეს ადგილობრივი მმართველობა ცენტრალიზებულია, მოსახლეობა კი ნაკლებად არის ჩართული თვითმმართველობის საქმიანობაში. სტრატეგიის თანახმად კი, რომელიც საქართველოს რეგიონული განვითარებისა და ინფრასტრუქტურის სამინისტრომ შეიმუშავა, ქვეყანაში მოქალაქეებზე ორიენტირებული თვითმმართველობა ჩამოყალიბდება და რეალური დეცენტრალიზაცია განხორციელდება.

დღევანდელი პრეზენტაცია საერთო სამოქალაქო მოძრაობა „მრავალენოვანი საქართველოს“ პროექტის ფარგლებში მოეწყო, რომელიც ბრიტანეთის საელჩოს ფინანსური მხარდაჭერით ხორციელდება. "მრავალეროვანმა საქართველომ" სტრატეგიის მოსახლეობისთვის გაცნობა და საჯარო დისკუსიების მოწყობა იტვირთა.

[მანანა სარაშვილი, ახალციხე]