თვითმმართველობის კოდექსს რეგიონული მედიისა და არასამთავრობო ორგანიზაციების წარმომადგენლები გაეცნობიან

შეხვედრა სასტუმრო „თბილისი მარიოტში“ 13:00 საათზე დაიწყება და მასში საქართველოს რეგიონული განვითარების მინისტრი დავით ნარმანია, მინისტრის პირველი მოადგილე თენგიზ შერგელაშვილი, მთავრობის კანცელარიის რეგიონებსა და თვითმმართველობებთან ურთიერთობის დეპარტამენტის უფროსი ირაკლი მელაშვილი, ადგილობრივი არასამთავრობო და მედია ორგანიზაციების წარმომადგენლები მიიღებენ მონაწილეობას.

შეგახსენებთ, რომ თვითმმართველობის რეფორმის შედეგად, გაიზრდება თვითმმართველი ქალაქების რაოდენობა და დღეს არსებულ ხუთ თვითმმართველ ქალაქთან ერთად, ეს სტატუსი დამატებით 13 ქალაქს მიენიჭება. თვითმმართველი ქალაქების მიმდებარე სოფლებისგან ჩამოყალიბდება თემები, რომლის ბაზაზეც ფორმირდება მუნიციპალიტეტები. თვითმმართველი ერთეულების - ქალაქებისა და მუნიციპალიტეტების მმართველი რგოლები იქნება არჩევითი.

გუბერნატორის ინსტიტუტის პარალელურად, შეიქმნება კოლეგიალური ორგანო, რომელშიც წარმოდგენილი იქნებიან საკრებულოს წევრები. ეს ორგანო ჩართული იქნება გადაწყვეტილებების მიღების პროცესში.კოდექსით, ასევე, განსაზღვრულია სოფლებში საზოგადოებრივი საბჭოების შექმნა, რაც სოფლის მაცხოვრებელთა რეალური საჭიროებების გამოვლენასა და მათ გადაწყვეტას შეუწყობს ხელს.

დღევანდელი შეხვედრა რეგიონული განვითარებისა და ინფრასტრუქტურის სამინისტროს, სამოქალაქო საზოგადოების რეგიონული ქსელის ფასილიტატორი არასამთავრობო ორგანიზაცია „სიდასა“ და ფონდ „ღია საზოგადოება - საქართველოს“ ორგანიზებით იმართება.

თვითმმართველობის კოდექსი საქართველოს მთავრობამ 30 ოქტომბრის სხდომაზე დაამტკიცა და მას საქართველოს პარლამენტი დღევანდელ ბიუროს სხდომაზე განიხილავს.

[SKnews.ge]