ცვლილებები ახალქალაქის #40-ე საარჩევნო ოლქში

#40-ე ახალქალაქის საარჩევნო ოლქში არჩევნების დროს 70-მა საარჩევნო უბანმა უნდა იმუშაოს. ამათგან, 7 ახალქალაქში, დანარჩენი კი მუნიციპალიტეტის სოფლებშია.

სოფლების საარჩევნო უბნების მისამართები იგივე დარჩა, რაც გასული წლების არჩევნებზე იყო. ქალაქის სამი საარჩევნო უბნის მისამართი კი შეიცვალა.

ქალაქ ახალქალაქის #67-ე საარჩევნო უბანი, რომელიც აღმაშენებლის ქუჩაზე მდებარეობდა , ნალბანდიანის ქუჩაზე, ქართული ახალგაზრდული ცენტრის შენობაში გადავიდა. #1-მა უბანმა კინოთეატრიდან #2 ქართული სკოლის შენობაში გადაინაცვლა. #2 უბანი კი ყოფილი რაიონული სამომხმარებლო კავშირიდან მხატვრული სკოლის შენობაში გადავიდა.

შეიცვალა საარჩევნო უბნებზე მდივნების არჩევის პროცედურაც. თუ გასულ წელს საარჩევნო უბნის მდივანს მხოლოდ ოპოზიციური პარტიიდან ირჩევდნენ, წელს მათ საარჩევნო უბნის 13 წევრისგან შემდგარი კომისია აირჩევს, ისევე როგორც უბნების თავმჯდომარეებსა და თავმჯდომარის მოადგილეებს. თუმცა პარტიებს, რომლებიც კოალიცია „ქართულ ოცნებაში“ შედიან, უფლება აქვთ სამიდან ერთი - თავმჯდომარის, თავმჯდომარის მოადგილის ან მდივნის პოსტი დაიკავონ.

ამ ეტაპზე #40 საარჩევნო ოლქის შემადგენლობა დაკომპლექტებულია. დაკომპლექტებულია ასევე საარჩევნო უბნების კომისიების შემადგენლობაც, სადაც ასევე 13 წევრია. 23 სექტემბერს ახალქალაქის #40-ე საოლქო საარჩევნო კომისიის პირველი სხდომა ჩატარდება.

„პირველი სხდომით საარჩევნო უბნებზე მუშაობა დაიწყება. საუბნო კომისიების ყველა წევრი შეიკრიბება და თავმჯდომარეს, მოადგილესა და მდივანს აირჩევს“, - ამბობს #40-ე საარჩევნო ოლქის თავმჯდომარე ასმიკ მარანგოზიანი.

ახალქალაქის მუნიციპალიტეტში წელს 40,485 ამომრჩეველია. #40 საარჩევნო ოლქში არის სპეციალური ამომრჩევლების სიებიც. მასში შედიან სამსახურში მყოფი მესაზღვრეები, რომელთათვისაც სპეციალური უბანი არ არის გახსნილი, მაგრამ მესაზღვრეებს შეუძლიათ თავიანთი არჩევანი სულდასა და კარწახის უბნებზე დააფიქსირონ. ასევე #40-ე ოლქში არის 5 თანამშრომელი, რომლებიც სხვა მუნიციპალიტეტებში არიან ჩაწერილი. ისინი ხმას ოლქიდან ყველაზე ახლომდებარე უბანში მისცემენ. ამ შემთხვევაში ეს #1 საარჩევნო უბანი იქნება. შეზღუდული შესაძლებლობების ადამიანებისა და იმ პირებისთვის, ვისაც საარჩევნო უბანზე მისვლა არ შეუძლია, კვლავ იქნება გადასატანი ყუთები.

[შუშან შირინიანი, ახალქალაქი]