'გაიაფებული'ლარი და გაძვირებული პროდუქტი

80 წლის მერუჟან კილოიანი ახალციხეში ოჯახთან ერთად ცხოვრობს. ამბობს, რომ ლარის გაუფასურების გამო თავისი პენსიით ახლა უფრო ნაკლებ პროდუქტს ყიდულობს: „ყველაფრის ფასმა მოიმატა, მართალია ცოტათი, მაგრამ საბოლოო ჯამში ემჩნევა ჯიბეს. მარტო ჩემი პენსია არაფერში მეყოფოდა, ოჯახის წევრები რომ არ მყავდნენ“.

მერუჟანის მსგავსად, ფასების ზრდაზე წუხს ნაზიბროლა გელაძეც: „პროდუქტები, თითქმის ყველაფერი, გაძვირებულია. ხალხი არ ლაპარაკობს ამაზე, თითქოს 20-30 თეთრი მერე რა, მაგრამ ასე თუ გაგრძელდა, ვეღარაფერს ვიყიდი".

მაგალითისთვის, უკრაინაში წარმოებული მზესუმზირის ზეთი 1 თვის წინ, ერთ-ერთ საბითუმო სუპერმარკეტში 13.5 ლარი ღირდა. ერთი თვის შემდეგ კი ფასი 5.5% ით გაიზარდა და 14 35 ლარს შეადგენს. დაახლოებით ამავე სიდიდით გაიზარდა ფასი კვების სხვა პროდუქტებზეც.

„ზოგზე მეტით, ზოგზე ნაკლებით, მაგრამ იმპორტულ პროდუქტებზე თითქმის ყველაზეა გაზრდილი ფასი. 25 კგ-იანი ფქვილი – 1 ლარით, 50 კგ-იანი შაქარი – 4 ლარით, ზეთი – 70 თეთრით, გააჩნია პროდუქტს და მის მოცულობას. ადგილობრივ პროდუქტებზე ზრდა ჯერ-ჯერობით არ არის, მაგრამ ბაზარზე ყველა სახის პროდუქტი არაა ქართული წარმოების,“ – ამბობს ერთ-ერთი სუპერმარკეტის მენეჯერი.

საქსტატის მონაცემებით, 2019 წლის ივნისის თვეში საშუალო ოჯახის საარსებო მინიმუმი 315.5 ლარია. საშუალო მომხმარებლის კი 166.6.
ადგილობრივი მეწარმეები ფასების ზრდით გამოწვეულ პრობლემებზე ღიად საუბრისგან თავს იკავებენ.

„მომწოდებელი რამდენი პროცენტითაც აძვირებს, იმდენით ვაძვირებთ ჩვენც, თუმცა ეს ჯერჯერობით გაყიდვებზე არ აისახება, იშვიათად თუ გამოთქვამს ვინმე პრეტენზიას“, – გვითხრეს თამარაშვილის ქუჩაზე მდებარე ერთ-ერთ მარკეტში.

დღეის მონაცემებით, კომერციულ ბანკებში, 1 ამერიკული დოლარი 2.97 ლარი ღირს.



[რობიზონ ზარიძე, ახალციხე]