‘ფქვილის ფასმა სამი ლარით მოიმატა’ – ახალციხეში პური ძვირდება

ახალციხეში დიდიმამიშვილის ქუჩაზე მდებარე საცხობში პური ხუთი თეთრით გაძვირდა. „დეკემბრის დასაწყისში ფქვილის ფასმა სამი ლარით მოიმატა. რამდენიმე თვის წინ თეთრ ფქვილს 41 ლარად ვყიდულობდით, ახლა კი 51 ლარი ღირს. ხალხი ამბობს, არჩევნები მოიგეს და ფასებს მოუმატესო“, – ამბობს მცხობელი ლია გაჩეჩილაძე.

ამავე ქუჩაზე მდებარე კიდევ ერთ საცხობში ამბობენ, რომ ბოლო სამი თვის განმავლობაში, ჯამში, ერთ ტომარა ფქვილზე ფასი 12 ლარით გაიზარდა: „თონე სამი თვის წინ გავხსენით, მაშინ 43 ლარი ღირდა ფქვილი, ახლა კი 55 ლარად ვყიდულობთ. დეკემბრის დასაწყისში გაყიდვები შემცირდა, ჩვენც ვწუხვართ და ხალხიც“, – ამბობს მესაკუთრე ნუნუ მერაბიშვილი.

პურის მცხობელების უმეტესობას პურის ფასი არ გაუზრდია, თუმცა ამბობენ, რო ფასის მატება გარდაუვალია. „ხალხის მდგომარეობიდან გამომდინარე, ვცდილობთ ფასს არ მოვუმატოთ, თუმცა რამდენ ხანს გავძლებთ ასე არ ვიცი, ჯიბიდან ხომ არ დავდებთ?!“ – ამბობს ერთ–ერთი მცხობელი, რომელიც რუსთაველის ქუჩაზე არსებულ საცხობში მუშაობს.

პენსიონერი იამზე ბერიძე ამბობს, რომ პურის ფასის მატება მის მძიმე სოციალურ მდგომარეობას კიდევ უფრო ართულებს: „პენსია წამლების საყიდლად და კრედიტის პროცენტის სახდელად არ მყოფნის, მაღაზიაში კი პური გაძვირებული დამხვდა, არ ვიცი რა უნდა ვქნა.

ფქვილის ფასის მატებასთან დაკავშირებით პრემიერ-მინისტრმა მამუკა ბახტაძემ განაცხადა, რომ პურის გაძვირება შესაძლოა უსამართლო კონკურენციის შედეგი იყოს, რის გამოც შესაბამის ორგანოებს საკითხის გამოკვლევა დაავალა: „მოამზადონ ანგარიში, რასთან გვაქვს საქმე.
არასამართლიანი კონკურენციის კეთების საშუალებას ვერავის მივცემთ“, - განაცხადა პრემიერმა ბრიფინგზე.

პურის ფასთან დაკავშირებით კომენტარები 10 დეკემბერს გამართული მთავრობის სხდომის დასრულების შემდეგ ეკონომიკის მინისტრმაც გააკეთა. გიორგი ქობულიამაც შესაძლო არასამართლიან კონკურენციაზე ისაუბრა:„პურის ფასმა მკვეთრად მოიმატა. ამან რასაკვირველია, გამოიწვია ჩვენი ყურადღება და ჩვენ ამას გამოვიძიებთ და შევისწავლით“.

[ავთო ინასარიძე, ახალციხე]