ახალციხეში პროდუქტზე ფასებმა მოიმატა

სურსათის მაღაზიებში მოქალაქეების რიგები არ წყდება. განსაკუთრებული მოთხოვნაა ფქვილზე, შაქარზე, წიწიბურაზე, ზეთსა და მაკარონზე.

„კორონავირუსთან დაკავშირებით ყველაფერი გაძვირდა. გუშინ 50 კგ–იან შაქარში 86 ლარი მივეცი, არადა სამი დღის წინ 74 გადავიხადე. შემომტანმა გააძვირა ამიტომ იძულებული ვარ, რომ ფასი მოვუმატო. ერთი კილო შაქარი 1,50 ლარი ღირდა ახლა 2 ლარად ვყიდი. ყველაფერი ხელოვნურად ხდება, როგორ შეიძლება სამ დღეში ასე გაძვირდეს“,–გვითხრა თამარაშვილის ქუჩაზე მდებარე ერთ–ერთი მარკეტის მეპატრონემ.

მისი თქმით, ბოლო ერთი კვირაა რაც პროდუქტზე ფასების მომატება დაიწყო.

„აი ნახეთ, წყალს 2 ლარად ვყიდდი, შემომტანმა ახლა 2,20 ლარი დაადო, ესეც სხვა ქვეყნიდან ხომ არ შემოდის?! მოიმატა ზეთმაც, მაკარონმაც. 8 ლარში ვღებულობდი, გუშინ 9 ლარი გადავიხადე. კიდევ რამდენით გაძვირდება არ ვიცი“,–ამბობს მაღაზიის მეპატრონე.

ადგილობრივები შიშობენ, რომ პროდუქტზე ფასი შეიძლება კიდევ გაიზარდოს, ამიტომ სურსათის მომარაგება დაიწყეს. მათი თქმით, ხელისუფლება მაქსიმალურად უნდა ეცადოს, რომ სურსათის შემომტანმა კომპანიებმა ფასები ხელოვნურად არ გაზარდონ.

„ვიყიდე მაკარონი, ზეთი, რაც მჭირდებოდა, მერე შეძლება კიდევ გაძვირდეს“, – ამბობს აბასთუმანში მცხოვრები სვეტლანა ფილიმონოვა.

მაღაზიების მეპატრონეები ამბობენ, რომ საკმარისი მარაგი აქვთ და ამ კუთხით მოსახლეობას სანერვიულო არ აქვს.

„გუშინ ვიყიდე მაღაზიისთვის პროდუქტი. საწყობში ყველაფერი იყო, მაკარონი ვერ ვიყიდე მარტო და დაგვამშვიდეს, რომ თბილისიდან მოაქვთ კონტეინერებით და დღეს ღამე ჩამოვა, მე ვფიქრობ ჯერ მაგის საშიშროება არ არის,“– გვითხრა ერთ–ერთი მაღაზიის მეპატრონემ.

პრემიერ–მინისტრმა გიორგი გახარიამ განაცხადა, რომ ქვეყანაში სურსათის დეფიციტი არ იქნება და ამის საშიშროება არ არსებობს.

"თქვენგან რაც გვინდა, ისაა, რომ სასაწყობე ნაშთები იყოს შესაბამის დონეზე და სადისტრიბუციო ქსელში რომ პრობლემები არ შეიქმნას. თან ვიცით ობიექტურად ციფრებით, რომ საფუძველი დეფიციტური მოთხოვნის ქვეყანაში არ არსებობს. ამიტომ, გადავწყვიტოთ ეს პრობლემები ისე, რომ თქვენგან უნდა მივიღო სოციალურ პასუხისმგებლობაზე დაფუძნებული კონკრეტული წინადადებები და დაპირებები. ჩვენი მხრიდან ჩვენ ავიღებთ იმ ვალდებულებებს, რაც ჩვენი ვალდებულებაა და შევასრულებთ. ძირითადი ამოცანა მდგომარეობს იმაში, რომ ამ ქვეყნის მოქალაქემ ძირითადი მოხმარების პროდუქტებზე დეფიციტი არ უნდა იგრძნოს საფუძველი არ არის უბრალოდ ამის. მთლიანად მთავრობის ინფრასტრუქტურა მზად არის, რომ მოგეხმაროთ, ოღონდ პროდუქტი უნდა იყოს თაროზე თავის დროზე საკმარისი რაოდენობით და შესაბამისი ფასით დღევანდელ გამოწვევებთან", - განაცხადა 14 მარტს გიორგი გახარიამ სასურსათო მაღაზიათა ქსელების ხელმძღვანელებთან შეხვედრისას.

ცნობისთვის, ახალი კორონა ვირუსი საქართველოში პირველად 26 თებერვალს დაფიქსირდა. 17 მარტის მონაცემებით ქვეყანაში ვირუსი 34 ადამიანს დაუდგინდა.



[ნუკა სტეფნაძე, ახალციხე]